ވޯޓުލާން ރެޖިސްޓްރީ ވެފައިވާ ތަނަކަށް ވޯޓުލާން ދިޔުމުގެ ފުރުސަތު ދިނުމަށް އީސީން ގޮވާލައިފި
މި މަހުގެ 10ވަނަ ދުވަހު ބާއްވާ ލޯކަލް ކައުންސިލް އިންތިޚާބުގައި ވޯޓުލާން ރަޖިސްޓްރީވެފައިވާ ތަނަކަށް ވޯޓުލާން ދިއުމުގެ ފުރުސަތު ދިނުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އަށް އިލެކްޝަންސް ކޮމިޝަން (އީސީ)ގެ ރައީސް އަހުމަދު ޝަރީފް މިއަދު ގޮވާލައްވައިފިއެވެ.
ޝަރީފު މިއަދު ކުރެއްވި ޓްވީޓުގައި ވިދާޅުވީ ވޯޓުލުމުގެ ހައްގު އަދާކުރުމަށް އެއްވެސް ފަރާތަކުން ހުރަސް އަޅައިގެން ނުވާނެ ކަމަށެވެ. ނަމަވެސް އެއީ ސީދާ ކޮން ކަމަކާ ގުޅޭ ވާހަކައެއް ކަމެއް ޝަރީފް ވިދާޅެއް ނުވެއެވެ.
"ވޯޓުލުމުގެ ޙައްޤު އަދާ ކުރުމަށް އެއްވެސް ފަރާތަކުން ހުރަސް އަޅައިގެން ނުވާނެ. ވޯޓު ރެޖިސްޓަރ ވެފައިވާ ތަނަކަށް ވޯޓުލާން ދިޔުމުގެ ފުރުސަތު ދިނުމަށް އެޗްޕީއޭއަށް ގޮވައިލަން" އީސީ ޝަރީފު ވިދާޅުވިއެވެ.
ޝަރީފްގެ އިތުރުން އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބް ވެސް މިއަދު ވަނީ އެ މީހަކު ރަޖިސްޓްރީވެފައިވާ ފޮއްޓަކަށް ވޯޓުލުމުގެ ފުރުސަތު ލިބިދޭން ޖެހޭނެ ކަމަށް ވިދާޅުވެ ޓްވީޓެއް ކުރައްވައިފައެވެ.
"ވޯޓުލުމުގެ ފުރުސަތު ވޯޓުލާން އަންނަ އެންމެންނަށް ލިބޭނެ،" ހަބީބް ވިދާޅުވިއެވެ.
ކޮވިޑްގެ މި ހާލަތުގައި އިންތިހާބެއް ކުރިމަތިވެފައިވުމުން، އިލެކްޝަންސް ކޮމިޝަންގެ ކަންބޮޑުވުންތަކެއް އެބަހުއްޓެވެ.
އެގޮތުން އީސީގެ އެއް ކަންބޮޑުވުމަކީ، މޮނިޓަރިންގެ ހާލަތުގައިވާ ރަށްރަށަށް ވޯޓުލާން ދެވޭނެ ކަމަށް އެޗްޕީއޭއިން ވިދާޅުވި ނަމަވެސް، އެކަމާ ގުޅޭގޮތުން ރަސްމީކޮށް އެއްވެސް ގޮތެއް އަންގާފައި ނެތުމެވެ. އަދި، ކަރަންޓީނުގައާއި އައިސޮލޭޝަނުގައި ތިބި މީހުން އަމިއްލައަށް ވޯޓުލާން ދާން ޖެހޭ ގޮތަށް އޮތުމަކީ ވެސް އެ ކޮމިޝަންގެ ކަންބޮޑުވުމެއްކަން ފާހަގަ ކުރައްވާފައިވެއެވެ.
Ads by STO
