ކަރަންޓީނުގައި ތިބޭ މީހުން ވޯޓުލާންދާން ޓެކްސީ،ބަހަށް ނޭރޭނެ
ކޮވިޑް-19ގެ ސަބަބުން އެކަހެރި (އައިސޮލޭޓް) ކޮށްފައި ތިބި ނުވަތަ ކަރަންޓީނު ކޮށްފައިތިބި މީހުންނަށް ، ލޯކަލް ކައުންސިލްގެ އިންތިޚާބުގައި ވޯޓްލާން ދާން ޓެކްސީ އާއި ބަސް ފަދަ ޕަބްލިކް ޓްރާންސްޕޯޓް ބޭނުން ނުކުރެވޭނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އަންގައިފި އެވެ.
މި ފަހަރުގެ އިންތިހާބުގައި ކޮވިޑަށް ފައްސި ވެފައި ތިބި މީހުންނަށް ވެސް ވޯޓުލެވޭނެ ކަމަށް އިލެކްޝަންސް ކޮމިޝަނުން ވަނީ ވިދާޅުވެފައެވެ. އަދި އެ މީހުން ވޯޓުލާން ދިޔުމުގެ ހުއްދަ އެޗްޕީއޭއިން ވަނީ ދެއްވައިފައެވެ. ނަމަވެސް އެ މީހުންނަށް ވޯޓުލެވޭނެ ގަޑިއަކީ ހޮނިހިރު ދުވަހުގެ ހަވީރު 5:00 އިން 6:00 އަށެވެ. އަދި އެކަހެރިކޮށްފައި ތިބި މީހުންނަށާއި ކަރަންޓީނުގައި ތިބޭ މީހުންނަށް ވެސް ވޯޓު ލެވޭނީ، އެހެން މީހުން ދިޔުމުން ކަމަށް ވެސް އެޗްޕީއޭއިން ނިންމަވާފައިވެއެވެ.
ކަރަންޓީނުގައި ތިބޭ މީހުން ވޯޓުލުމާ ގުޅޭގޮތުން ޕަބްލިކް ހެލްތުގެ ޑިރެކްޓާ ޖެނެރަލް މައިމޫނާ އަބޫބަކުރު މިރޭ ނެރުއްވި އެންގުމެއްގައި ވިދާޅުވީ އެފަދަ މީހުން ވޯޓުލާން ދިޔުމުގެ ހުއްދަ ދިން ނަމަވެސް، ގިނަ ކަންތައްތަކަށް ސަމާލުކަން ދޭން ޖެހޭނެ ކަމަށާއި އޭގެ ތެރޭގައި ކަރަންޓީނުގައި ނުވަތަ އެކަހެރިކޮށްފައި ތިބޭ މީހުން، ޓެކްސީ އާއި ބަހާއި ފެރީ ފަދަ ޕަބްލިކް ޓްރާންސްޕޯޓް ބޭނުން ނުކުރުން ހިމެނޭ ކަމަށެވެ.
މިރޭ ނެރުއްވި އެންގުމުގައި ވިދާޅުވެފައި ވަނީ ތިރީގައި ބަޔާން ކޮށްފައިވާ ފިޔަވަޅުތަކާއެކު އެފަރާތްތަކަށް، ވޯޓުލާން ދިޔުމަށް ހުއްދަ ދީފައިވާ ކަމަށެވެ.
1 .އިލެކްޝަންސް ކޮމިޝަނުން ކަނޑައަޅައިފައިވާ ގޮތެއްގެ މަތީން ވޯޓުލާ މަރުކަޒުތަކަށް ދިޔުން.
2 .ހުރިހާ ވަގުތެއްގައި މާސްކު އަޅައިގެން ތިބުމާއި، 3 ފޫޓުގެ ގައިދުރުމިން ބެހެއްޓުން.
3 .ސެނިޓައިޒަރ ބޭނުން ކޮށްގެން އަތް ސާފުކުރުން.
4 .ޕަބްލިކް ޓްރާންސްޕޯޓް (ބަސް، ފެރީ، ޓެކްސީ ފަދަ ތަކެތި) ބޭނުން ނުކުރުން.
5 .ވޯޓު ލާން ދިޔުމާއި އެނބުރި ގެޔަށް އައުމާ ދެމެދު މީހުންނާ ބައްދަލު ނުކުރުން.
6 .ވޯޓުލުމަށް ފަހު، ކަރަންޓީނު ގައި ނުވަތަ އެކަހެރި ކުރެވިފައި ހުރި ތަނަށް ވަގުތުން އެނބުރި ދިޔުން
އެޗްޕީއޭއިން މިހާރު ވަނީ ކޮވިޑަށް ފައްސިވެފައި ތިބި މީހުން ވޯޓުލާން ދިޔުމުގެ ހުއްދަ ވެސް ދެއްވައިފައެވެ. އަދި ވޯޓުލާން ރަށްރަށަށް ކަރަންޓީނު ނުވެ ދެވޭނެ ގޮތް ވެސް މިއަދު ވަނީ ހަމަޖައްސާފައެވެ.
Ads by STO
