ވޯޓު ލުމުގެ ކަންކަން ކުރިޔަށް ގެންދާއިރު އަޅާފައިވާ ފިޔަވަޅުތަކަށް އަމަލު ކުރުމަށް އެޗްއާރްސީއެމުން ގޮވާލައިފި
ކޮވިޑް-19 ގެ މި ބަލިމަޑުކަން ފެތުރެމުން އަންނަ އިރު، މިހާރު ކުރިއަށް ދާ ލޯކަލް ކައުންސިލްތަކުގެ އިންތިހާބުގެ ކަންކަން ކުރިއަށް ގެންދަން ވާނީ ވީހާ ވެސް ތޮއްޖެހުން ކުޑަވާނެ ގޮތަށް ކޮވިޑް ނުފެތުރޭނެ ގޮތަށް ކަމަށް ހިއުމަން ރައިޓްސް ކޮމިޝަން (އެޗްއާރްސީއެމް) އިން ބުނެފިއެވެ.
އިންތިހާބާ ގުޅިގެން އެޗްއާރުސީއެމުން ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ މެންބަރު އައިމިނަތު ޝިފާއަތު އަބްދުއްރައްޒާގު ވިދާޅުވީ، އެންމެން އެއް ވަގުތެއްގައި ވޯޓުލާން ދިއުމަކީ ކޮވިޑް ފެތުރުމަށް މަގުފަހި ވާނެ ކަމެއް ކަމަށެވެ.
އިޖުތިމާއީ ގައިދުރު ކަމަށް ނުބަލައި ތިބޭކަން ފާހަގަ ކުރެވުނު ކަމަށާއި މި ހާލަތުގައި އަމަލު ކުރަން އަންގާފައިވާ އުސުލާ ހިލާފަށް އަމަލު ކުރަމުންދާ ތަން ފެންނަ ކަމަށް ޝިފާއަތު ވިދާޅުވިއެވެ. އެހެން ނަމަވެސް މިހާތަނަށް ބެލި ބެލުމުން ބޮޑެތި މައްސަލަތެއް ފެނިފައި ނުވާ ކަމަށް ވެސް ވިދާޅުވި އެވެ.
އަދި ކޮވިޑަށް ފައްސިވެފައިވާ މީހުންނާއި ކަރަންޓީނުގައި ތިބޭ މީހުން ވޯޓުލުމަށް ލިބެނީ އެއް ގަޑިއިރުކަމުން، އެ ނޫން އެހެން މީހުން ވޯޓުލުން އަވަސް ކުރުމަށް ވެސް އެޗްއާރުސީއެމުން އެދެއެވެ.
އެޗްްއާރުސީއެމްގެ މެމްބަރު މުއުމިނާ ވަހީދު ވިދާޅުވީ، ވޯޓުލާން އެކަށީގެންވާ މާހައުލެއް އޮތް މަންޒަރު ފެނިވަޑައިގަންނަވާ ކަމަށެވެ. އަދި ކެމްޕެއިން ކުރުމަށް ވެސް ފުލުހުން އެއްވެސް ހުރަހެއް އެެޅި މަންޒަރު ނުފެންނަ ކަމަށް ވިދާޅުވިއެވެ.
Ads by STO
