ވޯޓު ނުލުމަކީ ހައްލެއް ނޫން، އެންމެން ވެސް ވޯޓު ލާން ނުކުންނަވާ: ރައީސް ނަޝީދު
މިއަދު ހެނދުނުން ފެށިގެން ކުރިއަށްދާ ލޯކަލް ކައުންސިލް އިންތިޚާބުގައި ވޯޓުލާން ނުކުންނަ މީހުން މަދުވުމާއެކު، ވޯޓު ނުލުމަކީ ޙައްލެއް ނޫން ކަމަށާއި އެންމެން ވެސް ވޯޓުގައި ބައިވެރިވުމަށް ނުކުތުމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އިންތިޚާބުގައި ވޯޓުލެއްވުމަށް ފަހު ނޫސްވެރިންނާ ވާހަކަދައްކަވަމުން ރައީސް ނަޝީދު ވިދާޅުވީ ޤައުމެއް ބިނާ ކުރުމުގައި ރައްޔިތުންގެ ވޯޓަކީ މުހިންމު އެއްޗެއް ކަމަށާއި ވޯޓަކީ ކޮންމެ ފަރުދެއްގެ ކޮނޑުގައި އެޅިފައިވާ ފަރުދީ ޒިންމާއެއް ކަމަށެވެ.
ކޮންމެވެސް އެއް ފަރާތަކަށް ވޯޓުލުމަށް ނުކުންނެވުމަށް އިލްތިމާސް ކުރައްވަމުން ރައީސް ނަޝީދު ވިދާޅުވީ ރައްޔިތުންގެ ގިނަ ޝަކުވާތަކެއް ހުރިކަން އެނގިވަޑައިގަންނަވާ ކަމަށާއި، އެހެން ނަމަވެސް މިއަދަކީ ޑިމޮކްރަސީގެ ޙަޔާތުގައި މުހިންމު އުފާވެރި ދުވަހެއް ކަމަށެވެ.
"މިހާތަނަށް ކޮންމެ ފޮއްޓަކަށް 400 އަށްވުރެ ގިނަ މީހުން ވޯޓުލާފައިވާ ކަމަށް ބެލެވޭ. މެންދުރުފަހު ވޯޓުލާން ނުކުންނަ މީހުން ގިނަވާނެ ކަމަށް ލަފާ ކުރެވޭ" ރައީސް ނަޝީދު ވިދާޅުވިއެވެ.
ހެނދުނުއްސުރެ ވޯޓުލާ މަރުކަޒުތަކަށް ވަޑައިގެން ވޯޓު ފޮށިތައް ކައިރީ މަޑުކޮށްގެން ތިބި މީހުންނާ ރައީސް ނަޝީދު ވާހަކަ ދެއްކެވި ކަމަށް ބައެއް ފަރާތްތަކުން ވަނީ ބުނެފައެވެ. އަދި އެކަމުގެ ސަބަބުން، އިންތިޚާބުގެ ވަގުތުގައި އެމަނިކުފާނު ކެމްޕޭން ކުރެއްވި ކަމަށް ބައެއް ފަރާތްތަކުން ތުހުމަތު ކުރައްވައިފައެވެ.
Ads by STO
