ތެޔޮ ބޯޓުގައި ރޯވުން: ލިބުނު ގެއްލުން 10 މިލިއަން ރުފިޔާއަށް އަރާނެ ކަމަށް ބެލެވޭ
މިއަދު ހަވީރު އަލިފާން ރޯވެ ތެޔޮ ބޯޓެއް އަޑިއަށް ދިޔުމުން އެކަމުގެ ގެއްލުން 10 މިލިއަނެއްހާ ރުފިޔާއަށް އަރާނެ ކަމަށް ލަފާކުރެވޭ ކަމަށް އެ ބޯޓު އޮޕަރޭޓްކުރާ ކުންފުނި "ބްރޯ ފިއުލް"އިން ބުނެފިއެވެ.
އެ ތެޔޮ ބޯޓު އަނދައި އަޑިއަށް ދިޔައީ މިރޭ 6:27 ހާއިރުއެވެ. ބޯޓު އަޑިއަށް ދިޔައީ ރޯވި އަލިފާންގަނޑު ނިއްވާލުމުގެ މަސައްކަތް ސިފައިންގެ ފަޔަރ ފައިޓަރުން ކުރައްވަމުން ދަނިކޮށެވެ.
ބްރޯ ފިއުލްގެ ފަރާތުން އޮންލައިން ނޫހަކަށް މައުލޫމާތު ދެއްވަމުން އެ ކުންފުނީގެ އޮފިޝަލަކު ވިދާޅުވީ، އެ ތެޔޮ ބޯޓަކީ 100،000 ލީޓަރުގެ ޑީސަލް ރައްކާ ކުރެވޭ ޖާގައިގެ ބޯޓެއް ކަމަށެވެ. ނަމަވެސް ރޯވި އިރު ބޯޓުގައި ހުރީ ކިތައް ލީޓަރުކަން ބުނަން ނޭނގޭ ކަމަށް ވެސް އޭނާ ވިދާޅުވިއެވެ.
ނަމަވެސް އެމްއެންޑީއެފުން ބުނިގޮތުގައި ބޯޓުގައި ރޯވީ 60،000 ލީޓަރުގެ ޑީސަލާއެކު ޅ. އަތޮޅަށް ދަތުރުކުރަނިކޮށް އެނބޫދޫފިނޮޅު ކައިރީގައި އަޅާފައި އޮއްވައެވެ. އެނގިފައިވާ ގޮތުގައި މި ބޯޓު ޅ. އަތޮޅަށް ފުރީ ފުލްކޮށް ބަރުކޮށްގެންނެވެ. އެހެންކަމުން ބޯޓުގައި ރޯވި އިރު 100،000 ލީޓަރުގެ ޑީސަލް ހުންނާނެ ކަމަށް ބެލެވެއެވެ.
ބްރޯ ފިއުލްގެ އޮފިޝަލު ވިދާޅުވި ގޮތުގައި އެ ތެޔޮ ބޯޓުގެ އަގަކީ ނުވަ މިލިއަން ރުފިޔާއެވެ. އެހެންކަމުން އެނދި ޑީސަލާއެކު ގާތްގަނޑަކަށް 10 މިލިއަން ރުފިޔާގެ ގެއްލުންވި ކަމަށް ލަފާ ކުރެވޭ ކަމަށް އޭނާ ވިދާޅުވި އެވެ.
