ތިމަރަފުށީގެ ފަސް ގޮނޑި ވެސް އެމްޑީޕީއަށް ، އަތޮޅު ރައީސް ޕީޕީއެމްއަށް
މިއަދު ކުރިއަށް ދިޔަ ލޯކަލް ކައުންސިލް އިންތިޚާބުގައި ތ.ތިމަރަފުށީގެ ފަސް ގޮނޑި ވެސް ވެރިކަން ކުރާ އެމްޑީޕީން ކާމިޔާބު ކޮށްފިއެވެ.
ތިމަރަފުށީގެ ހުރިހާ ގޮނޑިއެއް އެމްޑީޕީ ކާމިޔާބު ކުރި ނަމަވެސް އަތޮޅު ރައީސްކަމަށް ހޮވިފައި ވަނީ ޕީޕީއެމުން ވާދަ ކުރި ކެނޑިޑޭޓް ޢަބްދުﷲ ޝަރީފެވެ.
އެމްޑީޕީގެ ސަޕޯޓް ބޮޑު ތިމަރަފުށީގެ ތާއީދު އަބްދުﷲ ޝަރީފަށް ނުލިބުނު ނަމަވެސް އޭނާ ވަނީ އަތޮޅުގެ އެހެން ގިނަ ރަށްރަށުން މެޖޯރިޓީ ހޯދައިފައެވެ. އަބްދުﷲ ޝަރީފާ މި އިންތިޚާބުގައި ވާދަ ކުރީ މި އިންތިޚާބުގައި އަތޮޅު ކައުންސިލްގެ ރައީސްކަމަށް ކުރިމަތި ލެއްވި ހަމައެކަނި އަންހެން ކެނޑިޑޭޓް ގަމަރުއެވެ.
މިއަދު ކުރިއަށް ދިޔަ ލޯކަލް ކައުންސިލް އިންތިޚާބުގައި އިދިކޮޅު ޕީޕީއެމުން ދަނީ މާލެއާއި އަތޮޅުތަކުން ބޮޑެތި ކާމިޔާބުތަކެއް ހޯއްދަވަމުންނެވެ. އެގޮތުން ގިނަ އަތޮޅުތަކެއްގެ ރައީސުންގެ ގޮނޑި އެ ޕާޓީން ކާމިޔާބު ކުރިއިރު މާލެ ސިޓީގެ މެޖޯރިޓީ ވެސް ވަނީ ހޯދާފައެވެ.
