ރައްޔިތުން މަތިން ހަނދާން ނެތުމުން، ރައްޔިތުން ބަސް އިއްވައިފި: މަލީހް
ލޯކަލް ކައުންސިލްތަކުގެ އިންތިހާބުން ފެނިގެން ދިޔައީ އެމްޑީޕީ ސަރުކާރުން ރައްޔިތުންގެ މަތިން ހަނދާން ނައްތާލުމުން، ރައްޔިތުން ބަސް އިއްވި ތަން ކަމުގައި ކުރީގެ ޓެކްނޮލޮޖީ އެންޑް ކޮމިއުނިކޭޝަންސް މިނިސްޓަރު މުހައްމަދު މަލީހް ޖަމާލް ވިދާޅުވެއްޖެއެވެ.
މަލީހު ވިދާޅުވީ ރައްޔިތުންގެ މަޖިލީހުގެ އިންތިހާބުން އެމްޑީޕީއަށް އިއްތިފާގަކުން 65 ގޮނޑި ލިބުމުން ރައްޔިތުން މަތިން ހަނދާން ނެތި ، ކުރި ކަންތަކުގެ ނަތީޖާ މިއަދު ފެނިގެން ހިނގައްޖެ ކަމަށެވެ.
"ރައްޔިތުންގެ މަތިން ހަނދާން ނެތި، ސުޕަމެޖޯރިޓީ ބޭނުންކޮށް، މާބޮޑު އިމްތިޔާޒުގެ ވެރި ބަޔަކަށް ހެދި، ނުހައްގުން ރައީސް ޔާމީން ޖަލަށްލާ އިންސާފު ނުދީ، ރައްޔިތުން އޮޅުވާލާ، ވައުދު މަތިން ހަނދާންނެތި، ސަރުކާރު ހުއްޓުނީމާ ރައްޔިތުން ބަސް އިއްވައިފި" މަލީހު ވިދާޅުވިއެވެ.
އިންތިހާބުގެ މިހާތަނަށް ލިބިފައިވާ ނަތީޖާތަކުން ދައްކާގޮތުގައި ރާއްޖޭގެ މެޖޯރިޓީ އެމްޑީޕީން ނެގި ނަމަވެސް އެމްޑީޕީއަށް ވަނީ މުހިންމު ގޮނޑިތަކެއް ގެއްލިފައެވެ. އެގޮތުން މާލޭ މޭޔަރު ކަމުގެ ގޮނޑީގެ އިތުރުން މާލޭ ސިޓީ ކައުންސިލްގެ މެޖޯޜިޓީ ވެސް ވަނީ ގެއްލިފައެވެ. މީގެ އިތުރުން އެމްޑީޕީގެ ފުލް މެޖޯރިޓީ އޮންނަ 12 މެމްބަރުން ހިމެނޭ އައްޑޫ ސިޓީ ކައުންސިލްގެ ހަގޮނޑި ވެސް އެމްޑީޕީއަށް ވަނީ ގެއްލިފައެވެ.
