ލާމަރުކަޒީ ނިޒާމު އުވައެއް ނުލާނެ: ރައީސް ނަޝީދު
ލާމަރުކަޒީ ނިޒާމު އުވާނުލާނެ ކަމަށް މަޖިލީހުގެ ރައީސް އަދި ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ވިދާޅުވެއްޖެއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އިއްޔެ ބޭއްވި ލޯކަލް ކައުންސިލު އިންތިހާބުގެ ވަކިވަކި ނަތީޖާތަކަށް ބެލުމުގެ އިތުރުން އެ ޕާޓީން ބަލަމުން އަންނަ އެއް ކަމަކީ ލާމަރުކަޒީ ނިޒާމު ހަރުދަނާކޮށް ހިންގުމުގެ މަސައްކަތް ކަމަށެވެ.
"މިހާރު މިވަނީ ޤާނޫނަށް ބޮޑެތި ބަދަލުތަކެއް ގެނެވިފަ. އަދި އެ ބަދަލުތަކާއެކުގައި އައު ކައުންސިލު މިވަނީ އިންތިހާބު ކުރެވިފަ. މާލެސިޓީ ކައުންސިލަށް މިސާލަކަށް ބައްލަވައިފިނަމަ މިވަގުތު މިއޮތް ގޮތުން ވަކި ސިޔާސީ ޕާޓީއަކަށް މާލެ ސިޓީ ކައުންސިލުގެ އަގުލަބިއްޔަތެއް ނެތް. މާލެސިޓީ ކައުންސިލުގެ އަގުލަބިއްޔަތު އޮތް ޕާޓީއެއް ނުވަތަ ޕާޓީތަކެއް ސާފުވާން އަދި ދެތިން ދުވަސް ނަގާނެ. ކޮންމެ ގޮތަކަށް އަގުލަބިއްޔަތު އޮތް ކަމުގައި ވީނަމަވެސް އެމްޑީޕީގެ އަމާޒަކަށް ވާނީ މާލެ ސިޓީ ކައުންސިލު ލާމަރުކަޒީ އުސޫލުތަކުގައިވާ ގޮތުގެ މަތިން އަދި ޤާނޫނުގައިވާ ގޮތުގެ މަތިން ރަނގަޅަށް ހިނގިގެން ދިޔުން" ރައީސް ނަޝީދު ވިދާޅުވިއެވެ.
މީގެއިތުރުން ރައީސް ނަޝީދު ވިދާޅުވީ މުއައްސަސާތައް ބިނާ ކުރުމަކީ އެމްޑީޕީގެ ވަރަށް ބޮޑު އަމާޒެއް ކަމަށެވެ. އަދި އެ ޕާޓީން މިހާރުވެސް މަސައްކަތް ކުރަމުން ދާނީ މާލޭސިޓީ ކައުންސިލު މުއައްސަސާއެއްގެ ގޮތުގައި ބިނާ ކުރުމަށްޓަކައި ކަމަށް ވިދާޅުވިއެވެ.
"މާލެސިޓީ ކައުންސިލުގައި އެމްޑީޕީގެ ގޮނޑިތައް ނުވަތަ މެމްބަރުންނާއި އެކުގައި މަސައްކަތް ކުރުމަށް އެދޭ އެހެން ޕާޓީތަކާއި އެކުގައި އެއް ފިކުރެއްގައި މަސައްކަތް ކުރުމަށް އެދޭ ފަރާތްތަކާ އެކުގައި ވެސް މި ޕާޓީން މަސައްކަތް ކުރަމުން ދާނެ" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ލާމަރުކަޒީ ނިޒާމު ހިނގަމުން ދާއިރު ބައެއް ފަހަރު އެމްޑީޕީ ވެރިކަމުގައި ނުވަތަ އަގުލަބިއްޔަތުގައި ތިބޭނެ ކަމަށާއި އަނެއްބައި ފަހަރު ވާދަވެރިންގެ ގޮތުގައި ތިބޭނެ ކަމަށެވެ. އަދި އޭގެން ކޮންމެ ފަހަރެއްގައި ވެސް އިޚްލާސްތެރި ކަމާއެކީގައި މަސައްކަތް ކުރުމަކީ އެ ޕާޓީގެ އަމާޒު ކަމަށް އެ މަނިކުފާނު ވިދާޅުވިއެވެ.
