އިލެކްޝަނުން ބަލި ވިޔަސް ސިޔާސީ ހަޔާތް ނިންމައެއް ނުލާނަން: ރައީސް ނަޝީދު
އިލެކްޝަނުން ބަލި ވިޔަސް ސިޔާސީ ހަޔާތް ނިންމައި ނުލައްވާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް ނަޝީދު ވިދާޅުވެއްޖެއެވެ.
އެމްޑީޕީގެ ފަރާތުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި އެމްޑީޕީއަށް ކުރިމަތިވި ނާކާމިޔާބީއާ ގުޅިގެން ސިޔާސީ މަސައްކަތުން ދުރަށް ޖެހިވަޑައިގަނެފާނެތޯ ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ނަޝީދު ވިދާޅުވީ އެކަހަލަ ވިސްނުންފުޅެއް ނުގެންގުޅުއްވާ ކަމަށެވެ.
"އަޅުގަނޑު ދަަންނަ އެއްވެސް ތަނެއްގައި ލޯކަލް ކައުންސިލް އިންތިހާބެއް ނިމިގެން ޕާޓީގެ މީހަކު ވަކިވި ތަނެއް ވެސް ނުދެކެން. މި ލީޑަރު ވަތްކެއް ނުވާނެ" ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ އެއްވެސް ސިޔާސީ ލީޑަރަކީ، އަދި ޕާޓީއަކީ ނުވަތަ ފިކުރަކީ ތާއަބަދަށް ދެމިގެންދާނެ އެއްޗެއް ނޫން ކަމަށާއި، އެ ފަރާތްތަކުން އެކަން ގަބޫލުކުރަން ޖެހޭނެ ކަމަށެވެ.
އަދި މަނިކުފާނަށް ވޯޓު ދޭން ނުފެންނަ މީހަކު ވެސް "ދާންވީ" ކަމަށާއި، ސިޔާސީ ހަޔާތުގައި އޮތް މަގުބޫލުކަން ގެއްލިގެން ދާކަމަށް ގަބޫލު ނުކުރައްވާ ކަމަށް ވެސް ވިދާޅުވިއެވެ.
އިއްޔެ ބޭއްވި ލޯކަލް ކައުންސިލު އިންތިހާބާއި އަންހެނުންގެ ތަރައްޤީއަށް މަސައްކަތް މަސައްކަތް ކުރާ ކޮމިޓީތަކުގެ އިންތިހާބުން، މިހައިތަނަށް ނަތީޖާ ދައްކާ ގޮތުުން ބޮޑަށް ކާމިޔާބު ލިބިފައި ވަނީ އެމްޑީޕީއަށެވެ. ނަމަވެސް އިދިކޮޅު ޕީޕީއެމްއިން މުހިންމު ގޮނޑިތަކެއް ވެސް ކާމިޔާބު ކޮށްފައިވާކަން ނަތީޖާއިން ދައްކައެވެ.
އެގޮތުން ފާހަގަ ކޮށްލެވޭ އެންމެބޮޑު އެއް ގޮނޑިއަކީ މާލެސިޓީގެ މޭޔަރުކަން އިދިކޮޅު ޕީޕީއެމްގެ ކެންޑިޑޭޓް ޑރ. މުޙައްމަދު މުޢިއްޒު ކާމިޔާބު ކުރެއްވުމެވެ.
ގިނަ ބަޔަކު ވަނީ އެމްޑީޕީއަށް ލިބުނު ނާކާމިޔާބީގެ އަސްލަކީ ރައީސް ނަޝީދު ކަމަށް ބުނެފައެވެ.
Ads by STO
