ރައްޔިތުންގެ ނިންމުމާ އެއްގޮތަށް ކުރިއަށް ދާނަން: ރައީސް ޞާލިހު
އިއްޔެ ކުރިއަށް ދިޔަ ލޯކަލް ކައުންސިލްތަކުގެ އިންތިހާބުގައި ރައްޔިތުން ނިންމެވި ނިންމުމާ އެއްގޮތަށް ކުރިއަށް ވަޑައިގަންނަވާނެ ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވިއެވެ.
ލޯކަލް ކައުންސިލް އިންތިހާބާ ގުޅިގެން ނެރުނު ނޫސްބަޔާނެއްގައި ރައީސް ވަނީ ސިޓީ ކައުންސިލް، އަތޮޅު ކައުންސިލް، ރަށު ކައުންސިލް، އަދި ޑަބްލިއުޑީސީގެ ގޮނޑިތަކަށް ވާދަ ކުރައްވާ ކާމިޔާބީ ހޯއްދެވި ހުރިހާ ކެނޑިޑޭޓުންނަށް މަރުހަބާ ދަންނަވާފައެވެ. އަދި އިންތިޚާބުން ހޮވިވަޑައިގެންނެވި އެންމެހައި ފަރާތްތަކާއެކު ލާމަރުކަޒީ ނިޒާމުގެ ތެރެއިން ރާއްޖޭގެ އިދާރީ ދާއިރާތައް ހިންގުމުގައި އެފަރާތްތަކުގެ ފުރިހަމަ އެއްބާރުލެއްވުން ލިބޭނެ ކަމަށް އުންމީދު ކުރައްވާ ކަމަށް ރައީސް ޞާލިހު ވިދާޅުވިއެވެ.
"މި އިންތިޚާބުގައި ރައްޔިތުން ލީ ވޯޓާއި، ރައްޔިތުންގެ އިޙްސާސްތައް ފުރިހަމައަށް ސަރުކާރުން ބަލައިގަނެ، އަދި، ރައްޔިތުންގެ ވިންދާ އެއްގޮތަށް ސަރުކާރުގެ ހިންގުން ކުރިއަށް ގެންދާނެކަމުގެ ފުރިހަމަ ޔަޤީންކަން އަރުވައެވެ." ރައީސް އޮފީހުން ނެރުނު ނޫސްބަޔާނުގައި ވިދާޅުވިއެވެ.
އިންތިހާބުގެ މިހާތަނަށް ލިބިފައިވާ ނަތީޖާތަކުން ރާއްޖޭގެ މެޖޯރިޓީ އެމްޑީޕީން ނެގި ނަމަވެސް އެމްޑީޕީއަށް ވަނީ މުހިންމު ގޮނޑިތަކެއް ގެއްލިފައެވެ. އެގޮތުން މާލޭ މޭޔަރު ކަމުގެ ގޮނޑީގެ އިތުރުން މާލޭ ސިޓީ ކައުންސިލްގެ މެޖޯޜިޓީކަން ވެސް ވަނީ ގެއްލިފައެވެ. މީގެ އިތުރުން އެމްޑީޕީގެ ފުލް މެޖޯރިޓީ އޮތް އައްޑޫ ސިޓީ ކައުންސިލުން ވެސް މުހިންމު ގޮނޑިތަކެއް އެމްޑީޕީއަށް ވަނީ ގެއްލިފައެވެ.
