ބޮލުން ފައިބާ އިސްތަށިތައް އެއްކޮށްގެން މި މީހާ ކުރީ މޮޅު ކަމެއް
ތަފާތު ސްޓައިލްތަކަށް އިސްތަށިގަނޑު ހެދުމަކީ ފެޝަނެކެވެ. އެގޮތުން އިސްތަށިގަނޑުގައި ތަފާތު ކުލަ ޖެއްސުމާއި އެކި ޑިޒައިންތަކަށް ކޮށުން މީގެ ތެރޭގައި ހިމެނެއެވެ. ހަމަ އެއާއެކު އާރޓިފިޝަލްކޮށް އިސްތަށިގަނޑު ދިގުކުރުމަކީ ވެސް ގިނަ ބަޔަކު ކުރާ ކަމެކެވެ. " ހެއަރ އެކްސްޓެންޝަން " ނުވަތަ އާރޓިފިޝަލް ކޮށް އިސްތަށިގަނޑު ދިގުކުރާ އިރު ގިނަ މީހުން ބޭނުން ކުރަނީ ތަތްކުރާ އިސްތަށިގަނޑު ނުވަތަ ދަތި ޖަހައިގެން ހަރުކުރާ އިސްތަށިގަނޑެވެ. މި ހުރިހާ ވައްތަރުތަކަކީ ވެސް ފިހާރަތަކުން ލިބެން ހުންނަ ތަކެއްޗެވެ.
ދާދިފަހުން އަންހެން ކުއްޖަކު މިވަނީ ތަފާތު ގޮތަކަށް އާރޓިފިޝަލްކޮށް އިސްތަށިގަނޑު ދިގު ކޮށްފައެވެ. އެގޮތުން މިކަން ކުރުމަށް ޓަކައި އޭނާ ވަނީ އޭނާގެ ބޮލުން ފައިބާ އިސްތަށިތައް އަހަރެއް ވަންދެން ރައްކާ ކޮށްފައެވެ. ޓިކްޓޮކް ގައި ކޮކޮލީ379 ނަމަކަށް ކިޔާ އައިޑީއެއްގައި އުޅޭ މި ކުއްޖާ ވަނީ އޭނާ މިކަން ކުރި ގޮތް ހިއްސާ ކޮށްފައެވެ. އަދި މި ވީޑިޔޯއަށް 21 މިލިއަނަށް ވުރެ ގިނަ ވިއުސް ލިބިފައި ވެއެވެ. ބޮލުން ފައިބާ އިސްތަށިތައް ރައްކާކުރުމުގެ މަރުހަލާ ތަކުގެ ތެރެއިން އޭނާ ވަނީ ދުވާލެއްގެ މައްޗަށް ސާޅީހާއި ދުއިސައްތަ އާއި ދެމެދުގެ އަދަދަކަށް އިސްތަށި ފައިބާކަން ފާހަގަ ކޮށްފައެވެ. އަހަރެއްގެ މައްޗަށް ތިރީސް ހާސް އިސްތަށި ފައިބާނެ ކަމަށް އޭނާގެ ހިސާބުތަކުން ދައްކައެވެ.
އޭނާ ވަނީ ފެންވަރާއިރު އަދި ބާލީސް ތަކުންނާއި، ހެދުމުން ފެންނަ އިސްތަށިތައް ވެސް ރައްކާ ކޮށްފައެވެ. އަދި މިހުރިހާ އިސްތަށިތައް އެއްކޮށް ސީދަލަށް ބެހެއްޓުމަށްފަހު އެންމެ މަތީގައި ޓޭޕް އެޅުމަށްފަހު އޭނާ އިސްތަށިތައް ރައްކާކުރަމުން ދިޔައީ ދަބަހެއްގެ ތެރޭގައެވެ. އަދި އޭނާ ވަނީ މި ދަބަސް ފުރެންދެން އޭގައި އިސްތަށި ރައްކާކޮށްފައެވެ.
މި ހުރިހާ މަރުހަލާއެއް ވެސް ވީޑިޔޯ ކުރުމަށް ފަހު ޓިކްޓޮކްގައި ހިއްސާ ކުރުމުން ގިނަބަޔެއްގެ ލޯތައް މި ވީޑީޔޯއަށް ހުއްޓިގެން ދިޔައެވެ. އަދި 21 މިލިއަނަށް ވުރެ ގިނަ މީހުން ވީޑިޔޯ ބަލާފައިވާ އިރު މީސް މީޑިޔާގެ އެކި އެކި މަންސަތަކުގައި މި ވީޑިޔޯ ވަނީ ވައިރަލް ވެފައެވެ.
