އަހަރުގެ މިހާތަނަށް ރާއްޖެއަށް 333،000 އަށްވުރެ ގިނަ ފަތުރުވެރިން
މިއަހަރުގެ މިހާތަނަށް ރާއްޖެއަށް 333,000 އަށްވުރެ ގިނަ ފަތުރުވެރިން ޒިޔާރަތްކޮށްފިއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައި ވަނީ މިދިޔަ މަހުގެ 26 ވަނަ ދުވަހުއެވެ. އެ ދުވަހު ރާއްޖެއަށް 5،516 ފަތުރުވެރިން ވަނީ އައިސްފައެވެ. ހަމައެހެންމެ މިމަހުގެ މިހާތަނަށް ރާއްޖެއަށް އެވްރެޖްކޮށް ދުވާލަކަށް 3536 ފަތުރުވެރިން ޒިޔާރަތް ކޮށްފައި ވެއެވެ.
އަދި މިމަހުގެ ފުރަތަމަ 10 ދުވަހު ރާއްޖެއަށް 35،358 ފަތުރުވެރިން ވަނީ އައިސްފައެވެ. މިއާއެކު މިހާތަނަށް ރާއްޖެއަށް އައި ފަތުރުވެރިންގެ އަދަދު ވަނީ 333،928 އަރާފައެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައި ވަނީ 382،762 ފަތުރުވެރިންނެވެ.
ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތް ކޮށްފައި ވަނީ އިންޑިއާއިންނެވެ. ދެވަނަޔަށް އެންމެ ގިނަ ފަތުރުވެރިން އައިސްފައި ވަނީ ރަޝިޔާއިންނެވެ.
އިންޑިއާ އާއި ރަޝިޔާއިން ރާއްޖެ އަންނަ ފަތުރުވެރިން އިތުރު ވަމުން އަންނައިރު ސަރުކާރުން އަންނަނީ މި ދެ ގައުމާ ގުޅިގެން ރާއްޖޭގެ ފަތުރުވެރިކަން ކުރި އެރުވުމަށް ގިނަ މަސައްކަތްތަކެއް ކުރަމުންނެވެ.
ކޮވިޑް-19ގެ ހާލަތާއެކު ފަތުރުވެރިން ރާއްޖެ ގެނައުން ހުއްޓާލުމަށް ފަހު މިހާރު އަނެއްކާ ވެސް 682 ތަނަކުން ވަނީ އަލުން ހިދުމަތް ދޭން ފަށާފައެވެ. އޭގެ ތެރޭގައި 149 ރިސޯޓަކާއި، 385 ގެސްޓުހައުސްއެއްގެ އިތުރުން 137 ސަފާރީއަކާއި 11 ހޮޓަލެއް ހިމެނެއެވެ.
Ads by STO
