ކަނޑުމަތީގައި އުޅެނިކޮށް ހާލު ދެރަވި މީހަކު ހޮސްޕިޓަލަށް ގެންގޮސް ފަރުވާދެނިކޮށް ދޯނި ފުރައިފި
މަހަށް ނިކުމެ އުޅެނިކޮށް ހާލު ދެރަވި ބިދޭސީއަކު ގއ. އަތޮޅު ހޮސްޕިޓަލަށް ގެންގޮސް ފަރުވާ ދިނުމަށް ފަހު ދޫކޮށްލިއިރު އޭނާ މަސައްކަތް ކުރި ދޯނި ފުރައިފި ކަމަށް ހޮސްޕިޓަލުން ބުނެފިއެވެ.
އެއީ ކޮން ރަށެއްގެ ދޯންޏެއް ކަމެއް އަދި އެނގިފައެއް ނުވެއެވެ. އެމީހާ އަކީ "މަސްގެލެރީ" ނަމަކަށް ކިޔާ ދޯންޏަކުން މަހަށް ދިޔަ ބަންގްލަދޭޝް މީހެކެވެ.
ގއ.ވިލިނގިލީ ހޮސްޕިޓަލުން މައުލޫމާތު ދިން ގޮތުގައި އެ މީހާ ހޮސްޕިޓަލަށް ގެންދެވުނީ ބަނޑަށް ތަދުވެގެންނެވެ. އެމީހާގެ ހާލު މިހާރު ރަނގަޅު ކަމަށް އެ ހޮސްޕިޓަލުން ބުނެއެވެ.
އެމްއެންޑީއެފުން ބުނީ ގއ. ވިލިނގިލީގެ އިރު ދެކުނުން 23 ނޯޓިކަލް މޭލު ބޭރުން 16 މީހުންނާ އެކު މަސްވެރިކަން ކުރަން އުޅުނު ދޯންޏެއްގައި ހުރި ބިދޭސީ ފަޅުވެރިޔަކު ކުއްލި ސިއްހީ މައްސަލައެއް ދިމާވެގެން އެހީތެރިކަމަށް އެދުމުން ރޭ 3:20ގައި އެމްއެންޑީއެފްގެ އެހީތެރިކަމާއެކު ވިލިނގިލީގައި ހުންނަ އެ އަތޮޅު ހޮސްޕިޓަލަށް އޭނާ ގެންގޮސްފައި ވާކަމަށެވެ.
އެ މީހާ ހޮސްޕިޓަލުން މިހާރު ދޫކޮށްލާފައިވާ ކަމަށާއި ނަމަވެސް އޭނާއާ ހަވާލުވާނެ އެއްވެސް މީހަކު ނެތް ކަމަށް ހޮސްޕިޓަލުން މައުލޫމާތު ދެއެވެ.
