ދޯނީގައި ރޯވި އަލިފާންގަނޑު ކޮންޓްރޯލް ކޮށްފި، އަނިޔާވި ދެމީހުން އިތުރު ފަރުވާއަށް މާލެއަށް
ކ.ކުޑަވިލިނގިލީ ކައިރީގައި އޮތް ދޯންޏެއްގައި ރޯވި އަލިފާންގަނޑު ކޮންޓްރޯލް ކުރެވިއްޖެކަމަށް އެމްއެންޑީއެފުން ވިދާޅުވެއްޖެއެވެ.
މި ހާދިސާގައި ދެމީހަކަށް އަނިޔާވެފައިވާއިރު އެ ދެމީހުން ވެސް އެންމެ ފުރަތަމަ ގެންދެވުނީ ތުލުސްދޫއަށެވެ. ނަމަވެސް އެ ދެމީހުން ވެސް އިތުރު ފަރުވާއަށް މާލެއަށް ގެނައުމަށް އެމްއެންޑީއެފް ފަޔަރ ލޯންޗުގައި ދަތުރު ކުރަމުންދާ ކަމަށް އެމްއެންޑީއެފުން މައުލޫމާތު ދެއްވައެވެ.
މީގެ އިތުރުން އެމްއެންޑީއެފުން ވިދާޅުވީ އެ ދޯނީގައި އަލިފާނުގެ ހާދިސާ ހިނގަން މެދުވެރިވީ ބަދިގޭގައި ކައްކަން އުޅުމުގެ ތެެރޭގައި ކަމަށް މައުލޫމާތު ލިބޭ ކަމަށެވެ. އަދި އަލިފާން ކޮންޓްރޯލް ކުރެވި ދޯނި މިހާރު އޮތީ ދެ ފެން ދޭތެރޭގައި ކަމަށް ވެސް އެމްއެންޑީއެފުން ވިދާޅުވެއެވެ.
މި ހާދިސާގައި އަނިޔާވި މީހުންނަށް ލިބުނު އަނިޔާގެ އިތުރު މައުލޫމާތެއް އެމްއެންޑީއެފުން ހާމަ ކުރައްވާފައެއް ނުވެއެވެ.
މި ހާދިސާގެ ރިޕޯޓް އެމްއެންޑީއެފަށް ލިބުނީ މެންދަމު 03:32ހާއިރު ކަމަށް އެމްއެންޑީއެފުން ވިދާޅުވެއެވެ.
