7 ދުވަހުން އެޅި މިސްކިތް ހުޅުވައި، އެ މިސްކިތުގައި ނަމާދު ކުރަން ފަށައިފި
މާލޭގެ މަޖީދީ މަގުގައި ޒިކުރާ މިސްކިތް ކުރިން ހުރި ބިމުގައި ހަދާފައިވާ ވަގުތީ މިސްކިތް ހުކުރު ނަމާދަށް ހުޅުވައިފިއެވެ.
އެ މިސްކިތަކީ، ސަރުކާރުން ރޯދަ މަހަށް އެޅުމަށް މަސައްކަތް ކުރި މިސްކިތްތަކެއް ނަމަވެސް، މަސައްކަތްތައް ލަސްވެގެން ދިޔައީ އެތަން ކޮނުމުގެ ތެރެއިން އެކި ތަކެތި ފެނުމާ ގުޅިގެންނެވެ. ފެނުނު އެއްޗެހީގެ ތެރޭގައި މިނިކައްޓާއި އާސާރީ ތަކެތީގެ އިތުރުން އިހުގެ މިސްކިތެއްގެ ބައިތައް ހިމެނެއެވެ.
އެ މިސްކިތް ހުޅުވައިދެއްވީ އިސްލާމިކް މިނިސްޓަރު ޑރ. އަހުމަދު ޒާހިރު އަލީއެވެ. އެ މިނިސްޓްރީން ބުނީ ހަތް ދުވަހުގެ މަސައްކަތުން ނިންމާލެވުނު ވަގުތީ މިސްކިތުގައި އެއް ފަހަރާ 500 މީހުންނަށް ނަމާދު ކުރެވޭނެ ކަމަށެވެ.
މި މިސްކިތުގެ މަސައްކަތް ކޮށްފައި ވަނީ ސިވެކް ކުންފުނިންނެވެ.
ކުރީގެ ސަރުކާރުން ޒިކުރާ މިސްކިތް ހުރި ބިމުގައި 10 ބުރީގެ އޮފީސް އިމާރާތަކާ އެކު މިސްކިތެއް ހަދަން އެސްޖޭ ކޮންސްޓްރަކްޝަނާ ހަވާލުކުރި އެވެ. ނަމަވެސް އެ މަޝްރޫއު ހަވާލު ކުރުމުގައި ކޮރަޕްޝަން ހިމެނޭ ކަމަށް ބުނެ އެ އެގްރިމެންޓް ބާތިލް ކުރީއެވެ.
