ފްލެޓު ދިނުމަށް މާލޭގައި 14 ބުރީގެ ދެ އިމާރާތް އަޅަނީ

ބޯހިޔާވަހިކަން ފޯރުކޮށްދިނުމަށް މާލޭގެ ދެ ސަރަހައްދެއްގައި 14 ބުރީގެ ދެ އިމާރާތް އެޅުމަށް ޝައުގުވެރިވާ ފަރާތްތައް ހޯދަން ފަހި ދިރިއުޅުން ކޯޕަރޭޝަނުން އިއުލާން ކޮށްފިއެވެ.

Ads by Hajj Corporation

އެގޮތުން ފުރަތަމަ އިމާރާތް އެޅުމަށް 231،073.78 އަކަފޫޓުގެ ބިމެއް، މާލޭގެ ބްލޮކް ނަމްބަރު 307 ގައި ހަމަޖެހިފައިވާއިރު، ދެވަނަ އިމާރާތް އެޅުމަށް ހަމަޖެހިފައި ވަނީ މާލޭގެ ބްލޮކް ނަމްބަރު 319ގައި އޮތް 173،229.56 އަކަފޫޓުގެ ބިމެއްގައެވެ.

މި މަސައްކަތަށް ޝައުގުވެރިވާ ރާއްޖޭގެ ވެސް އަދި ރާއްޖެއިން ބޭރުގެ ކުންފުނިތަކަށް ވެސް މި ބީލަމުގައި ބައިވެރިވުމުގެ ފުރުސަތު މިހާރު ހުޅުވާލެވިފައިވާއިރު، އެ ފަރާތްތަކުން މިމަހުގެ 29 ވަނަ ދުވަހުގެ މެންދުރު ފަހު 2:00ގެ ކުރިން ރަޖިސްޓްރީ ވާން ޖެހޭ ކަމަށް ފަހި ދިރިއުޅުން ކޯޕަރޭޝަނުން ބުނެއެވެ. އަދި ޕްރޮޕޯސަލް ހުށަހަޅަން ފުރުސަތު ދީފައިވަނީ މިއަހަރުގެ ޖޫން މަހުގެ 16 ވަނަ ދުވަހުގެ ނިޔަލަށެވެ.

މީގެ އިތުރުން މި ދެ މަޝްރޫއުގެ ބިޑް ސެކިއުރިޓީގެ ގޮތުގައި ދިވެހި ކުންފުނިތަކުން 500،000 ރުފިޔާ އަދި ބޭރުގެ ކުންފުނިތަކުން 100،000 ޑޮލަރު ދައްކަން ޖެހޭ ކަމަށް ވެސް ފަހި ދިރިއުޅުން ކޯޕަރޭޝަނުން ވަނީ އަންގައިފައެވެ.