ނަތީޖާ އެއްވަރުވި ދާއިރާތަކުގެ ވޯޓުލުން އަންނަ މަހު 1ގައި
މި މަހުގެ 10 ވަނަ ދުވަހު ބޭއްވި ލޯކަލް ކައުންސިލުތަކާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިހާބުގެ ހަ ދާއިރާއެއްގެ ވޯޓު މެއި މަހުގެ 1 ވަނަ ދުވަހު ބޭއްވުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.
އީސީން މިރޭ ބޭއްވި ޖަލްސާގައި ބުނީ ހަ ދާއިރާއެއްގެ އިންތިހާބު އަލުން ބާއްވާއިރު، އޭގެ ތެރެއިން ދެ ދާއިރާއެއްގެ އިންތިހާބު އަލުން ބާއްވަނީ ޝަކުވާތަކާ ގުޅިގެން ކަމަށާއި، އަނެއް ހަތަރު ދާއިރާގެ އިންތިހާބު ބާއްވަނީ ނަތީޖާ އެއްވަރު ވެގެން ކަމަށެވެ. އެގޮތުން، ހަ ދާއިރާއެއްގެ ޖުމްލަ ހަތް މަގާމަކަށް މީހުން ހޮވުމަށް އަލުން އިންތިހާބު ބާއްވާނެ ކަމަށް އީސީން ބުނެފައި ވެއެވެެ.
އިންތިހާބު އަލުން ބާއްވާ ދާއިރާތައް:
- ހއ. ތަކަންދޫ ކައުންސިލް އަންހެނުންނަށް ހާއްސަ ކޮށްފައި ވާ ގޮނޑި (އޭ11-2)
- ބ. ކިހާދޫ ކައުންސިލް މެންބަރުގެ ގޮނޑި (އެފް4-3)
- މ. ރަތްމަންދޫ ކައުުންސިލް ރައީސްގެ ގޮނޑި (ކޭ1-1)
- ފ. ދަރަނބޫދޫ އަންހެނުންނަށް ހާއްސަ ކޮށްފައި ވާ ގޮނޑި (އެލް 4-2)
- ލ. މާވަށް ކައުންސިލް ރައީސްގެ ގޮނޑި (އޯ6-1)
- ލ. މާވަށް ކައުންސިލް މެންބަރުގެ ގޮނޑި (އޯ6-3)
- ތ. ގާދިއްފުށި އަންހެނުންނަށް ހާއްސަ ކޮށްފައި ވާ ގޮނޑި (އެން9-2) ދެ ކެންޑިޑޭޓުންނަށް ލިބުނު ވޯޓުގެ ފަރަގަކީ 2 ވޯޓު
އިންތިހާބު އަލުން ބާއްވަން ނިންމާފައި މިވާ ދާއިރާތަކުން ޝަކުވާތަކާ ގުޅިގެން އިންތިހާބު އަލުން ބާއްވަނީ ލ. މާވަށާއި ތ. ގާދިއްފުށީގެއެވެ.
އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިހާބުގެ ވެސް ހަ ދާއިރާއެއްގެ ވޯޓުލުން އަލުން ބޭއްވުމަށް ވަނީ ނިންމާފައެވެ. އެއީ:
- ހއ. އުލިގަމް (އޭ2)
- ނ. މަގޫދޫ (ޑީ9)
- ރ. މާކުރަތު (އީ8)
- ބ. ކެންދޫ (އެފް3)
- ވ. ފުލިދޫ (ޖޭ1)
- ލ. ކަލައިދޫ (އޯ12) މިއެވެ.
މީގެ އިތުރުން، އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް އިންތިހާބު ކުރަން ޖެހޭ އަދަދަށްވުރެ މަދުން ކެންޑިޑޭޓުން ކުރިމަތިލުމުގެ ސަބަބުން ބައެއް ދާއިރާތަކަށް ކުރިމަތިލުމުގެ ފުރުސަތު ހުޅުވާލައި އެ ދާއިރާތަކުގެ އިންތިހާބު އަލުން ބޭއްވުމަށް ވެސް އިލެކްޝަންސް ކޮމިޝަނުން ވަނީ ނިންމާފައެވެ.
