ގަރާޖު ސިޓީއަކާ ނުލައި އުޅަނދު ރަޖިސްޓާ ކުރެވޭ ގޮތަށް ހަދަން ފާސްކޮށްފި
އެއްގަމު ދަތުރުފަތުރުގެ ގާނޫނު އިސްލާހުކޮށް، ގަރާޖެއްގައި ޕާކު ކުރެވޭނެ ކަމުގެ ލިޔުމެއް ނެތި ހަތަރު ފުރޮޅުލީ އުޅަނދު ފަހަރު ރަޖިސްޓާ ކުރެވޭ ގޮތަށް ހަދަން ރައްޔިތުން މަޖިލީހުގެ ގައުމީ ތަރައްގީ އާއި ތަރިކައާ ބެހޭ ކޮމިޓީން ނިންމައިފިއެވެ.
މަޖިލީހަށް މިއިސްލާހް ހުށަހަޅާފައި ވަނީ ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ އެވެ. މި އިސްލާހު ހުށައަޅާފައިވަނީ ބައެއް ގަރާޖުތަކުގެ ވެރިފަރާތްތަކުން އެކަމުގެ ނާޖާއިޒް ފައިދާ ނަގައި ގަރާޖު ފީގެ ގޮތުގައި ނުވަތަ ގަރާޖު ކުލީގެ ގޮތުގައި ބޮޑެތި އަދަދުތަކުން ފައިސާ ނަގާ މައްސަލަ ހައްލު ކުރުމުގެ ބޭނުމުގައި ކަމަށް އެ ބިލުގައި ބުނެފައިވެއެވެ.
ކޮމިޓީ ރިޕޯޓުގައި ފާހަގަކޮށްފައިވާ ގޮތުގައި އެ އިސްލާހު ގެނައުމުގެ ބޭނުމަކީ ބައެއް ފަރާތްތަކުން ބޮޑު އަގުގައި ގަރާޖު ސިޓީ ވިއްކާ މައްސަލައިގައި ދައުލަތަށް ފައިދާ ނުވެ އަދި ރައްޔިތުންނަށް ވެސް ބޮޑެތި ގެއްލުންވަމުން ދާތީ އެކަން ހައްލު ކުރުމުގެ ބޭނުމުގައެވެ.
އެ މައްސަލަ ދިރާސާ ކުރިއިރު ގައުމީ ތަރައްގީ އާއި ތަރިކަ ކޮމިޓީން ވަނީ މާލެ ސިޓީ ކައުންސިލާއި ފުލުހުން އަދި ޓްރާންސްޕޯޓް އޮތޯރިޓީ އާއި ޓްރާންސްޕޯޓް މިނިސްޓްރީގެ އޮފިޝަލުން ހާޒިރުކޮށް ސުވާލުކޮށްފައެވެ. އެ އިދާރާތަކުގެ ލަފަޔާ އެކު ކޮމިޓީން ނިންމާފައި ވަނީ އެއްގަމު ދަތުރުފަތުރުގެ ގާނޫނުގެ 13 ވަނަ މާއްދާގެ (ރ) އިސްލާހު ކުރުމެވެ.
އެގޮތުން ރާއްޖޭގައި އިންޖީނުލީ އެއްގަމު އުޅަނދު ރަޖިސްޓްރީ ކުރަން ހުށަހަޅާއިރު ގަރާޖެއްގައި އެ އުޅަނދެއް ބާއްވާނެ ކަމުގެ ލިޔުން ހުށަހަޅަން ލާޒިމްނުވާ ގޮތަށް އެ މާއްދާ އިސްލާހު ކުރިއެވެ.
ބޮޑުން މުއްސަނދިން ބޭނުންވާހާ ގޮތަކަށް ހަދަމުން ދާކަށެއް ނޫން މެމްބަރުން ހޮވާފަ ތި ތިބީ. ޢަހަރަމެންނާ އަރާހަމަ ވާނެތާ. ނިކަން ތައްޔާރުގަ މި ތިބީ.