ވައްކަމެއްގެ ތުހުމަތު ކުރެވުނު ވެމްކޯގެ މުވައްޒަފަކު ވަޒީފާއިން އެކަހެރިކޮށްފި
ވައްކަމެއްގައި ބައިވެރިވިކަމަށް ތުހުމަތު ކުރެވޭ ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)ގެ މުވައްޒަފު މަސައްކަތުގެ މަސްއޫލިއްޔަތުން އެކަހެރިކޮށްފައި ވާކަމަށް އެ ކުންފުނިން ބުނެފިއެވެ.
ވެމްކޯގެ މުވައްޒަފަކު ވަގަށް ނަގައިފައިވާކަމަށް ތުހުމަތު ކުރެވޭ ބައެއް ތަކެއްޗާއެކު އެ މުވައްޒަފު ފެންނަ ވީޑިއޯއެއް މީސްމީޑިއާގައި ވަނީ އާންމުވެފައެވެ.ވެމްކޯއިން ބުނެފައި ވަނީ 24 މެއި ވަނަ ދުވަހުގެ ވަގުތެއްގައި މީސްމީޑިއާ ވަސީލަތްތައް މެދުވެރިކޮށް ދައުރުވަމުންދާ ވީޑިއޯގައި ފެންނަ ފަރާތަކީ އެ ކޯޕަރޭޝަންގެ މަސައްކަތާ ވަގުތީ ގޮތުން ގުޅިފައިވާ ކޮންޓްރެކްޓް މުވައްޒަފެއް ކަމަށެވެ.
އަދި ހިނގައިދިޔަ އެ ހާދިސާއަކީ އެ ކޯޕަރޭޝަނުން ނުހަނު ކަންބޮޑުވާ، އަދި އެއްވެސް ހާލެއްގައި ބަލައިގަންނަ ފަދަ އަމަލެއް ނޫން ކަމަށާއި އެ މައްސަލައިގައި ޝާމިލްވާ މުވައްޒަފާ ދޭތެރޭ ވަގުތުން ފިޔަވަޅު އަޅައި، މަސައްކަތުގެ މަސްއޫލިއްޔަތުން އެކަހެރި ކުރެވިފައިވާނެކަމަށް ވެމްކޯއިން ބުނެއެވެ.
މީގެ އިތުރުން އެ މައްސަލައިގެ ތަހުޤީޤަށް މޯލްޑިވްސް ޕޮލިސް ސާރވިސްއަށް ދޭންޖެހޭ ހުރިހާ އެއްބާރުލުމެއް އެ ކޯޕަރޭޝަން އިން ދަނީ ފޯރުކޮށްދެމުން ކަމަށާއި އެ ފަދަ އެއްވެސް މައްސަލައެއްގައި ޝާމިލްވާ އެ ކޯޕަރޭޝަންގެ ކޮންމެ މުވައްޒަފަކާ މެދު ހަރުކަށި ފިޔަވަޅު އެޅުމަށް ފަސްނުޖެހޭނެކަމުގެ ޔަޤީންކަން އެންމެހާ ރައްޔިތުންނަށް އަރުވާކަމަށް ވެސް ވެމްކޯއިން ބުނެއެވެ.
