ކޮވިޑް-19އަށް ފައްސި ވިޔަސް ތަހުގީގަށް އެއްވެސް ހުއްޓުމެއް ނާދޭ: ފުލުހުން

ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދުއަށް އަމާޒުކޮށް މި މަހުގެ ހަ ވަނަ ދުވަހު ދިން ހަމަލާއާ ގުޅިގެން މިހާރު ކުރިއަށް ގެންދާ ތަހުގީގަށް ހައްޔަރު ކޮށްފައި ތިބި ހަތަރު މީހަކާއި ތަހުގީގުގައި ބައިވެރިވާ ވަރަށް ގިނަ އޮފިސަރުން ކޮވިޑަށް ޕޮޒިޓިވްވީ ނަމަވެސް ތަހުގީގަށް އެއްވެސް ހުއްޓުމެއް ނާންނަ ކަމަށް މޯލްޑިވްސް ޕޮލިސް ސާވިސް ވިދާޅުވެއްޖެއެވެ.

Ads by STELCO

ރައްޔިތުންގެ މަޖިލީހުގެ އިއްޔެގެ ޖަލްސާގައި ހޯމް މިނިސްޓަރު އިމްރާން އަބްދުﷲ ވިދާޅުވީ ރައީސް ނަޝީދަށް އަމާޒުކުރި ޓެރަރިސްޓް ހަމަލާގެ ތަހުގީގަށް މިހާރު ވެސް 450 އެއްހާ މެމްބަރުން ހާއްސަ ކޮށްފައިވާ ކަމަށާއި ތަހުގީގަށް އެކަށީގެންވާ ކުރިއެރުން ވެސް ލިބިފައިވާ ކަމަށެވެ. ނަމަވެސް ތަހުގީގުގެ ސްޕީޑް ލަސްވާތީ ހޯމް މިނިސްޓަރު ވަނީ ކަންބޮޑުވުން ފާޅު ކުރައްވައިފައެވެ.

މިނިސްޓަރ އިމްރާން ވިދާޅުވީ ތަހުގީގްގެ ސްޕީޑް ލަސް ވަނީ ހައްޔަރު ކޮށްފައި ތިބި ހަތަރު މީހުންނާއި ތަހުގީގުގައި ބައިވެރިވާ ވަރަށް ގިނަ އޮފިސަރުން ކޮވިޑް-19އަށް ފައްސި ވެފައިވާތީ ކަމަށެވެ.

ހޯމް މިނިސްޓަރުގެ މި ވާހަަކަތަކާ ގުޅޭގޮތުން ބައެއް ނޫސްވެރިން ސުވާލު ކުރުމުން ފުލުހުންގެ މީޑިއާ އޮފިޝަލަކު ވިދާޅުވީ، ރައީސް ނަޝީދަށް އަމާޒުކޮށް ދިން ހަމަލާގެ ތަހުގީގު ކުރިއަށްދާ ކަމަށާއި ތަހުގީގަށް އެއްވެސް ހުއްޓުމެއް ނާންނަ ކަމަށެވެ.

ރައީސް ނަޝީދަށް ދިން ހަމަލާއާ ގުޅިގެން ހައްޔަރުކޮށްފައިވާ ހަތަރު މީހުންގެ އިތުރުން ޓެރަރިޒަމާ ދެކޮޅަށް މިހާރު ކުރިއަށް ގެންދާ އޮޕަރޭޝަންގައި ވެސް 14 މީހަކު ވަނީ ހައްޔަރު ކޮށްފައެވެ.