މާލޭގެ ކުލި ކުޑަކުރަން މަޖިލީހަށް ކޮށްދެވޭނެ ކަމެއްނެތް ކަމަށް އަންގައިފި
މާލޭ ޓެނަންޓްސް ޔޫނިއަންގެ ފަރާތުން މީގެ އަހަރެއްހާ ދުވަސް ކުރިން މާލޭގެ ކުލީގެ މައްސަލައަށް ހައްލެއް ހޯދުމަށް 800އަށް ވުރެ ގިނަ މީހުންގެ ސޮޔާ އެކު ރައްޔިތުންގެ މަޖިލީހަށް ފޮނުވި ޕެޓިޝަންގެ ޖަވާބުގައި ކުލި ކުޑަކުރުމަށް މަޖިލީހުގެ ކޮމިޓީއަށް ކުރެވޭނެ ކަމެއް ނެތްކަމަށް އެ ކޮމިޓީން، ޓެނަންޓްސް ޔޫނިއަންއަށް އަންގަވައިފިއެވެ.
މި ޕެޓިޝަނުގައި ފާހަގަކޮށްފައި ވަނީ މިހާރު މާލޭގެ ކުލި ހުރީ ރައްޔިތުންނަށް ލިބޭ އާމްދަނީއާ ނުބައްދަލު މިންވަރެއްގައި ކަމަށާއި، މިހާ ބޮޑު ހޭދައެއް ހަމައެކަނި ކުލި ދައްކަން ހޭދަ ކުރަން ޖެހުމާއި، އެކަމުގެ ސަބަބުން މަދު ބަޔަކު މުއްސަނދިވި ނަމަވެސް ގިނަ ބަޔަކު ފަޤީރުކަމުން އަރައިނުގެނެވޭނެ ކަމަށެވެ.
ޕެޓިޝަން ދިރާސާކުރި މަޖިލީހުގެ ޕެޓިޝަން ކޮމިޓީން މި މަހުގެ 24 ވަނަ ދުވަހުގައި އެ ޕެޓިޝަނަށް ޖަވާބު ދީފައިވެއެވެ. ޖަވާބުގައި ފޮނުވި ސިޓީގައި ވިދާޅުވެފައި ވަނީ ޕެޓިޝަނުގައި ފާހަގަކޮށްފައިވާ މައްސަލައާ ގުޅިގެން ބޭންކް އޮފް މޯލްޑިވްސްގެ އިތުރަށް ކަމާ ބެހޭ ފަރާތްތަކާ ކޮމިޓީން ބައްދަލުކޮށްފައިވާ ކަމަށެވެ.
ޕެޓިޝަން ކޮމެޓީން ވަނީ މައްސަލަ ދިރާސާ ކުރިއިރު ބޭންކް އޮފް މޯލްޑިވްސް (ބީއެމްއެލް)ގެ ކަމާބެހޭ ފަރާތްތަކާ ވެސް މަޝްވަރާ ކޮށްފައެވެ. އެގޮތުން މާލޭގައި އިމާރާތް ކުރާ ތަންތަނަކީ އެކި ފެންވަރުގެ ތަންތަން ކަމަށާއި ބީއެމްއެލް އިން ދޫކުރާ ލޯނުތަކަކީ ވެސް އެ ނިސްބަތުން ދޫކުރާ ލޯނުތަކެއް ކަމަށް ބުނެފައިވެއެވެ.
ގެދޮރު އިމާރާތް ކުރުމުގެ ދާއިރާއަކީ ބައެއްގެ އަމިއްލަ ވިޔަފާރިކަން ފާހަގަކޮށް ޕެޓިޝަން ކޮމިޓީން ވިދާޅުވީ ގެދޮރުގެ ކުލި ކަނޑައެޅުމަކީ އެ އިމާރާތްކުރާ ބަޔަކު ނުވަތަ ގޯތީގެ ވެރިފަރާތުގެ އަމިއްލަ އިހުތިޔާރުގައި ނިންމާ ނިންމުމެއް ކަމަށެވެ. އެހެންކަމުން އަމިއްލަ ފަރާތްތަކުން ކުރާ މިފަދަ ވިޔަފާރިތަކަށް ގޮތް ނިންމުމަކީ ކޮމިޓީއަށް ކުރެވޭނެ ކަމެއް ނޫންކަމުގައި އެ ކޮމިޓީން ވިދާޅުވިއެވެ.
