ބްލެކް ލައިވް މެޓާރސްގެ ކޯ ފައުންޑަރ އިސްތިއުފާދީފި
ބްލެކް ލައިވް މެޓާރސްގެ ނަމުގައި ޝޯޝަލް މީޑިޔާގައި ކުރިއަށްގެންދާ ކެމްޕޭނުގެ ކޯ ފައުޑަރ ޕެޓްރިސް ކަލަރ އެ ކެމްޕޭނުގެ މަސައްކަތްތަކުން އިސްތިއުފާ ދީފިއެވެ.
ކަޅު މީހުންނާ މެދު ގެންގުޅޭ ނަސްލީ ތަފާތުކުރުންތަކާ ދެކޮޅަށް ދުނިޔޭގެ ފެންވަރުގައި ހިންގާ މިކެމްޕޭނުން ޕެޓްރިސް އިސްތިއުފާ ދީފައި މިވަނީ ކެމްޕޭނުގައި ޑޮނޭޝަންގެ ގޮތުގައި ލިބުނު ފައިސާ އަމިއްލަ ކަންކަމަށް ބޭނުންކޮށްފައިވާ ކަމުގެ ތުހުމަތުކޮށްފައި ވަނިކޮށެވެ. އޭނާގެ މައްޗައް މިތުހުމަތުތައް ކުރެވުނީ ދާދިފަހުން އޭނާ 4 ގެއެއް ގަނެފައިވާކަން ފަޅައި އެރުމުންނެވެ.
އެހެން ނަމަވެސް އޭނާ ވަނީ މިތުހުމަތުތައް ދޮގުކޮށްފައެވެ. އަދި އިސްތިއުފާ ދީފައި ވަނީ ތުހުމަތުތަކާ ގުޅިގެން ނޫން ކަމަށާއި އިސްތިއުފާ ދޭން މީގެ އަހަރެއްހާ ދުވަސް ކުރިންސުރެ ވެސް ޕްލޭންކޮށްފައިވާކަމަށް ޕެޓްރިސް ބުނެފައެވެ.
ބްލެކް ލައިވް މެޓާރސް ކެމްޕެއިނުން އެހީގެ ގޮތުގައި މިދިޔަ އަހަރު އެކަނި ވެސް 90 މިލިއަން ޑޮލަރު ހޯދައިފައިވާ ކަމަށާއި އަހަރު ނިމުނު އިރު 60 މިލިއަން ޑޮލަރު ބާކީ ހުރިކަމަށް ވެސް އެކެމްޕެއިންގެ ތަފާސް ހިސާބުތަކުން ދައްކައެވެ.
ބްލެކް ލައިވް މެޓާރސް ކެމްޕެއިންގެ ހަރަކާތްތައް އެންމެ ބާރަށް ކުރިއަށް ގެންގޮސްފައި ވަނީ ކަޅު ނަސްލުގެ ޖޯޖް ފްލޮއިޑް ހައްޔަރު ކުރުމުގެ ތެރޭގައި ހިންގައިފައިވާ ލާއިންސާނީ އަމަލުތަކުގެ ސަބަބުން އޭނާ މަރުވުމާ ގުޅިގެންނެވެ. މިހާދިސާއާ ގުޅިގެން ދުނިޔޭގެ އެކި ހިސާބުތަކުގައި ބޮޑެތި މުޒާހަރާތައް ކުރިއަށް ގެންގޮސްފައިވެއެވެ.
Ads by STO
