އަބަދު ކިޔަވާނަމަ ކުދިންގެ ސިކުނޑި ވަރުބަލިވާނެ، އުފާވާނެ ކަންކަން ކުރަން ފުރުސަތު ދީ: މިނިސްޓަރު
އަބަދު ކިޔަވާނަމަ ކުދިންގެ ސިކުނޑި ވަރުބަލިވާނެ ކަަމަށާއި އޭގެ ބަދަލުގައި އެ ކުދިން ހިތްހަމަ ޖެހޭ ކަންކަން ކުރަން ވެސް ފުރުސަތު ދޭން ޖެހޭ ކަމަށް އެޑިއުކޭޝަން މިނިސްޓަރު އާއިޝަތު ޢަލީ ވިދާޅުވެއްޖެއެވެ.
މިނިސްޓަރު ވަނީ ދަރިވަރުން ގޭގައި އެހާ ގިނަ ވަގުތު ހޭދަކުރާއިރު ތާވަލެއް ހަދައި އެއާ އެއްގޮތަަށް މަސައްކަތް ކުރުމަށް ބެލެނިވެރިންނަށް ގޮވައިލައިފައިއެވެ.
ހެލްތު އެމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ ވަނީ މިވަގުތު 72 ރަށެއް ކޮވިޑް-19އާ ގުޅިގެން މޮނިޓަރިންގައި އޮތް ކަމަށާއި، އެރަށްތަކުގައި ތިބޭ ދަރިވަރުން ގިނަ ވަގުތު ތިބެނީ ގޭގައިކަން ފާހަގަ ކުރައްވާފައެވެ.
މިނިސްޓަރު އިތުރަށް ފާހަގަ ކުރެއްވީ ތާވަލަކާ އެއްގޮތަށް މަސައްކަތް ނުކުރާތީ ކުދިންގެ މޯޓިވޭޝަން ގެއްލި ކަންކަން ކުރާހިތް ކެނޑޭ ކަމަށެވެ. އަދި އެކަން ހުއްޓުވުމަަށް ތާވަލެއް ހެދުން މުހިންމު ކަމުގައި މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ ޚާއްސަކޮށް ނިދުމަށާއި ކެއުމަށް އަދި ކިޔެވުމަށް އޮންނަ ގަޑިތަކަށް އެ ކަންކަން ކުރުން އެއީ ވަރަށް މުހިންމު ކަމެއް ކަމުގައެވެ
."އަބަދު ކިޔާވާ ކަމުގައި ވެއްޖެއްޔާ ކުދިންގެ ސިކުނޑި ވަރުބަލި ވެގެން ދާނެ. އެކުދިން ވެސް ބޭނުންވާނެ ކޮންމެވެސް ވަރަކަށް އެކުދިން ހިތްހަމަޖެހޭ ކަމެއް ކޮށްލަން. އެހެންކަމުން ދުވަހުގެ ތާވަލު ބަހާލާއިރު، މިހުރިހާ ކަމެއް އޭގެ ތެރެއަށް ލެވޭ ކަހަލަ ގޮތަކަށް ކުދިންނަށް އެ ތާވަލު ރާވާލަ ދޭން ހަމަ ބެލެނިވެރިން އެހީތެރިވެ ދެއްވާށޭ" މިނިސްޓަރ ވިދާޅުވިއެވެ.
