ކުޑަކުދިންގެ ހިޔާގައި އަނެއްކާ ވެސް އަލިފާނުގެ ހާދިސާއެއް ހިނގައިފި
ވިލިމާލޭގައި ހުންނަ ކުޑަކުދިންގެ ހިޔާގައި އަނެއްކާ ވެސް އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފުން ވިދާޅުވީ ވިލިމާލޭގައި ހުންނަ ކުޑަކުދިންގެ ހިޔާގެ 2 ވަނަ އިމާރާތުގައި ހުރި ގުދަނެއްގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ ރިޕޯޓު މިއަދު 10:46 ހާއިރު ލިބިފައިވާ ކަމަށެވެ.
މި ހާދިސާގައި މީހަކަށް އަނިޔާއެއް ލިބިފައެއް ނުވެއެވެ. އެހެން ނަމަވެސް ތަކެއްޗަށް އެކިވަރުގެ ގެއްލުން ލިބިފައިވާކަމަށް އެމްއެންޑީއެފުން މައުލޫމާތުދެއެވެ.
ތަނުގެ ފޮޓޯތައް އެމްއެންޑީއެފުން ވަނީ އާންމުކޮށްފައެއެވެ. ގިނަ ތަކެއްޗަށް ބޮޑެތި ގެއްލުން ލިބިފައިހުރިކަން ފޮޓޯތަކުން ފާހަގަވެއެވެ. އެތަނުގައި އަލިފާން ރޯވަން މެދުވެރިވި ސަބަބެއް އަދި ހާމަކޮށްފައެއް ނުވެއެވެ.
ވިލިމާލޭގައި ހުންނަ ކުޑަކުދިންގެ ހިޔާގައި މިދިޔަ މަހު 4 ވަނަ ދުވަހު ވެސް ވަނީ އަލިފާނުގެ ހާދިސާއެއް ހިނގާފައެވެ. އެ ހާދިސާ ހިނގައިފައި ވަނީ ކުދިން ދިރިއުޅޭ ކޮޓަރިއެއްގައެވެ. އަދި އެއްވެސް ކުއްޖަކަށް އަނިޔާ ލިބިފައެއް ނުވެއެވެ. ނަމަވެސް ތަކެއްޗަށް ވަނީ ބޮޑެތި ގެއްލުން ލިބިފައެވެ.
Ads by STO
