ޖަމާއަތުގައި ނަމާދު ކުރުން ތިނަދޫގައި ވަގުތީ ގޮތުން ހުއްޓައިލައިފި
ގދ. ތިނަދޫގައި ކޮވިޑަށް ފައްސިވާ މީހުންގެ އަދަދު އިތުރު ވަމުން ދާތީ އެ ރަށު މިސްކިތްތަކުގައި ޖަމާއަތުގައި ނަމާދު ކުރުން ވަގުތީ ގޮތުން ހުއްޓައިލައިފިއެވެ.
ތިނަދޫ ކައުންސިލުން ކުރި އިއުލާނެއްގައި ބުނެފައި ވަނީ، 06 ޖޫން 2021 ވާ އާދިއްތަ ދުވަހުގެ ޢިޝާ ނަމާދުން ފެށިގެން 13 ޖޫން 2021 ވާ އާދިއްތަ ދުވަހުގެ ރޭ ޢިޝާނަމާދުގެ ނިޔަލަށް މިސްކިތްތަކުގައި ވަގުތީގޮތުން ޖަމާއަތުގައި ނަމާދުކުރުން ހުއްޓައިލާނެ ކަމަށާއި، މިސްކިތުގައި ހަމައެކަނި ބަންގި ގޮވުމަށާއި، ބަންގީގެ ފަހުގައި ގޭގައި ނަމާދު ކުރުމަށް 2 ފަހަރު ގޮވާނެ ކަމަށެވެ.
ތިނަދޫ ކައުންސިލުން މިހާލަތާ ގުޅިގެން އަޅައިފައިވާ ފިޔަވަޅުތަކުގެ ތެރޭގައި:
- މަސްވެރިކަމުގައި ޙަރަކާތްތެރިވާ ކުދި އަދި ބޮޑު ދޯނިފަހަރުތައް މަހަށް ފުރުމުގެ ކުރިން ކައުންސިލުން ޙާއްސަ ހުއްދައެއް ނެގުން
- ސިނާއީ މަސައްކަތްކުރާ ސައިޓްތަކުގެ މަސައްކަތްތައް 07 ޖޫން 2011 އިން ފެށިގެން 01 ހަފްތާއަށް މަޑުޖައްސައިލުން.
- ފިހާރަތަކުން ޚިދުމަތް ދިނުމާ ގުޅޭގޮތުން އީއޯސީއިން ކަނޑައަޅައިފައި އުޞޫލާ އެއްގޮތަށް އަމަލު ކުރޭތޯ މޮނިޓަރކޮށް ބެލުން. އަދި އެ އުޞޫލާ ޚިލާފްވާ ފަރާތްތަކާ މެދު އެޗް.ޕީ.އޭގެ ގައިޑްލައިންއާ އެއްގޮތަށް ފިޔަވަޅު އެޅުން އަދި މިހާރެކޭ އެއްގޮތަށް ޕޮލިސް ޕޯޓަލްއިން ހުއްދަ ނަގައިފައިވާ ފަރާތްތަކުން ހަވީރު 16:00 އިން ރޭގަނޑު 21:00އަށް ޑެލިވަރީގެ ޚިދުމަތް ދިނުން.
- ހޮޓާ ރެސްޓޯރަންޓް ޚިދުމަތް ދިނުމާ ގުޅޭގޮތުން އީއޯސީއިން ކަނޑައަޅައިފައިވާ އުޞޫލާ އެއްގޮތަށް އަމަލްކުރޭތޯ މޮނިޓަރކޮށް ބެލުން. އަދި އެ އުޞޫލާ ޚިލާފްވާ ފަރާތްތަކާ މެދު އެޗް.ޕީ.އޭގެ ގައިޑްލައިންއާ އެއްގޮތަށް ފިޔަވަޅު އެޅުން. ހަމަ އެއާ އެކު މިހާރެކޭ އެއްގޮތަށް ޕޮލިސް ޕޯޓަލްއިން ހުއްދަ ނަގައިފައިވާ ފަރާތްތަކުން ހަވީރު 16:00އިން ރޭގަނޑު 22:00އަށް ޑެލިވަރީގެ ޚިދުމަތް ދިނުން.
މީގެ އިތުރުން މިދަނޑިވަޅުގައި މިސްކިތުގައި ނަމާދު ނުކުރި ނަމަވެސް ފަރުޟު ފަސް ނަމާދު ބަރާބަރަށް އަދާ ކުރުމަށާއި، ސުންނަތް ނަމާދު ގިނަކޮށް، ކީރިތި ޤުރުއާން ކިޔަވައި، ގިނަގިނައިން ދުޢާކޮށް، އިސްތިޣްފާރު ކުރުމަށް ހުރިހާ ރައްޔިތުންނަށް ނަސޭޙަތްތެރިވެ ވަޞިއްޔަތްކުރާ ކަމަށް އެ އިއުލާނުގައި ބުނެފައިވެއެވެ.
ތިނަދޫން 237 މީހުން ކޮވިޑް-19އަށް ފައްސިވެފައިވެއެވެ. ހަރަކާތްތެރި ވޭދަނައިގެ ގޮތުގައި އެރަށުގައި މިހާރު ވެސް 68 މީހުން އެބަތިއްބެވެ.
Ads by STO
