ޑރ. ހުސައިނަށް ރުހުންދޭން މަޖިލީހުން ފާސްކޮށްފި
ފިޝަރީޒް މިނިސްޓަރުކަމުގެ މަގާމަށް އައްޔަން ކުރެއްވި ޑރ.ހުސައިން ރަޝީދު ހަސަނަށް ރުހުންދޭން މަޖިލީހުގެ ސަރުކާރުގެ މަސްޢޫލިއްޔަތު އަދާ ކުރާ މިންވަރު ބަލާ ކޮމިޓީން ފާސްކޮށްފިއެވެ.
ޑރ.ހުސައިން ފިޝަރީޒް މިނިސްޓަރުކަމުގެ މަގާމަށް އައްޔަން ކުރެއްވީ މިދިޔަ މަހުގެ 5ވަނަ ދުވަހުއެވެ. އެހެން ނަމަވެސް ޑރ.ހުސައިންގެ ހިއްސާއެއް އޮންނަ ކުންފުންޏެއް އޮތުމުގެ ސަބަބުން ހުވައާ މެދު ސުވާލު އުފައްދައި އެކަމުގެ ގާނޫނީ ލަފައެއް ލިބެންދެން ކޮމިޓީން ވަނީ ރުހުން ދިނުން މަޑު ޖައްސައިލައިފައެވެ.
ޑރ،ހުސައިންގެ ހިއްސާއެއް އެއްވެސް ކުންފުންޏެއްގައި ނެތްކަމަށް ވިދާޅުވެ އިކޮނިމިކް މިނިސްޓްރީން މިހާރު ވަނީ މަޖިލީހަށް ސިޓީއެއް ފޮނުއްވައިފައެވެެ. ކޮމިޓީގެ މުގައްރިރު އަދި މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވިދާޅުވީ ޑރ.ހުސައިން އޭނާގެ ހިއްސާ ދޫކޮށްލައްވައިފައިވާ ކަމަށާއި އެހެން ނަމަވެސް ހިއްސާއެއް އޮތުމަކީ މަގާމަށް އައްޔަން ކުރުމަށް އޮތް ހުރަހެއް ނޫން ކަމަށް އެޓަރނީ ޖެނެރަލް އިބްރާހިމް ރިފްއަތު ލަފާ ދެއްވައިފައިވާ ކަމަށެވެ.
މީގެ އިތުރުން ދަނގެތި ދާއިރާގެ މެންބަރު މުހައްމަދު ނާޒިމް މިއަދު ބޭއްވި ކޮމިޓީ ބައްދަލުވުމުގައި ވިދާޅުވީ ޑރ.ހުސައިންއަށް ރުހުން ދިނުމުގައި އެއްވެސް ހުރަހެއް ނެތް ކަމަށެވެ. މި ހުށަހެޅުއްވުމަށް ފުވައްމުލަކު ދާއިރާގެ މެންބަރު ހުސައިން މުހައްމަދު ދީދީ ވަނީ ތާއީދު ކުރައްވައިފައެވެ.
