ހާލަތުން އަރައިގަތުމަށް ޕީސީއާރް މެޝިނެއް ގެނެސް، ޓެސްޓް ކުރުން އިތުރު ކުރަން ޖެހޭ: ފައިހަތު
ގދ. ތިނަދޫއާއި ގައްދޫގައި ހަލުވިކަމާ އެކު ކޮވިޑް-19 ފެތުރެމުންދާ މި ދަނޑިވަޅުގައި އެ އަތޮޅަށް ޕީސީއާރް މެޝިނެއް ގެނެސް، ޓެސްޓިންގ ކެޕޭސިޓީ އިތުރު ކުރަން ޖެހޭ ކަމަށް ގދ. އަތޮޅު ކައުންސިލްގެ ރައީސް ހަސަން ފައިހަތް ގުދުރަތުﷲ ވިދާޅުވެއްޖެއެވެ.
ފައިހަތު މިފަދައިން ވިދާޅުވެފައި ވަނީ އެ އަތޮޅުގެ ތިނަދޫއާއި، ގައްދޫގައި ކޮވިޑް-19 ފެތުރުން ގިނަވެފައިވާ ދަނޑިވަޅެއްގައެވެ. މި ދެ ރަށުގައި ވެސް ޚާއްސަ ފިޔަވަޅުތައް އަޅާފައިވީ ނަމަވެސް ދުވަހެއް ދުވަހަކަށް ފައްސިވާ މީހުންގެ އަދަދު ދަނީ އިތުރުވަމުންނެވެ.
“ދެން”އަށް މަޢުލޫމަތު ދެއްވަމުން ފައިހަތު ވިދާޅުވީ ފައްސިވާ އަދަދުތައް އިތުރުވަމުންދާ ނަމަ، އެ އަތޮޅުގައި ކޮވިޑް ބަލި މީހުންނަށް ފަރުވާ ދެވޭނެ ކެޕޭސިޓީއެއް ނެތް ކަމަށެވެ. އަދި ގދ.ތިނަދޫ މިހާރު އޮތް ހާލަތުން އަރައިގަތުމަށް ފުރަބަންދުކޮށް މޮނިޓަރިންގ ވަރުގަދަކުރަން ޖެހޭ ކަމަށް ވެސް ފައިހަތު ވިދާޅުވިއެވެ.
“ލޮކްޑައުންގެ ވާހަކަ ދައްކަން މި ޖެހެނީ ކޭސެސް އިތުރު ވެއްޖެނަމަ ފަރުވާ ދެވޭނެ ކެޕޭސިޓީއެއް މިއަތޮޅުގައި ނެތުމުން. ދުވަހެއް ދުވަހަކަށް އަދަދުތައް ދަނީ އިތުރުވަމުން. އަދަދުތައް މަދުކުރެވެން އޮތީ ލޮކްޑައުންއަކަށް ގޮސްގެން” ފައިހަތު ވިދާޅުވިއެވެ.
ފައިހަތު އިތުރަށް ވިދާޅުވީ އެ އަތޮޅުގެ ވެރިކަން ކުރާ ރަށް، ގދ.ތިނަދޫން ފައްސިވާ މީހުން އިތުރުވަމުން ދިޔުމާ ގުޅިގެން ރަށް ފުރަބަންދުކޮށް ، މޮނިޓަރިންގެ ފިޔަވަޅުވަޅުތައް ވަރުގަދަ ކުރުން އެއީ ފެނިވަޑައިގަންނަވާ އެންމެ ރަނގަޅު ގޮތް ކަމަށެވެ.
ތިނަދޫ މޮނިޓަރިންގައި އޮންނަތާ 2 މަސް ދުވަސް ވާން ކައިރިވި އިރު ވެސް ތިނަދޫގެ ހާލަތަށް އިތުރު އެއްވެސް ބަދަލެއް ނާދެއެވެ. ތިނަދޫގެ ކޮވިޑުގެ ހާލަތު ގޯސްވެ ކޮންމެ ދުވަހަކު ވެސް އާ ވޭދަނަތައް ފެންނަމުންދާއިރު އެރަށުގައި މިހާރު ވެސް 302 މީހުން ކޮވިޑް-19އަށް ފައްސިވެފައިވެއެވެ. އެ ރަށުގައި ހަރަކާތްތެރި ވޭދަނައިގެ ގޮތުގައި 118 މީހުން އެބަތިއްބެވެ.
ތިނަދޫ ޑރ.ޢަބްދުއްޞަމަދު މެމޯރިއަލް ހޮސްޕިޓަލުން ވަނީ ރައްކާތެރިކަމުގެ ފިޔަވަޅުތައް އެޅުމަށް އާންމުންނަށް އިލްތިމާސްކޮށްފައެވެ. އަދިކޮންޓެކްޓް ޓްރޭސިންއާ ގުޅޭ އެއްވެސް މައުލޫމާތެއް ހިއްސާ ކުރައްވަން ބޭނުންފުޅު ނަމަ ތިނަދޫ ކޮވިޑް ހޮޓްލައިން ނަންބަރު 7934641އާ ގުޅުއްވައި މައުލޫމާތު ހިއްސާ ކުރެއްވުމަށް ވެސް އެ ހޮސްޕިޓަލުން އެދެއެވެ.
