ދައުރު ނިމޭ އިރު ގިނަބަަޔަަަށް ބޯހިޔާވަހިކަން ކަށަވަރުވާނެ: ރައީސް ޞާލިޙް
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މި ދައުރު ނިމޭއިރު ގިނަބަޔަކަށް ބޯހިޔާވަހިކަން ކަށަވަރުވާނެކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރަށްރަށުގައި އަމިއްލަ ގެދޮރު ބިނާކުރަން "ގެދޮރުވެރިޔާ" ލޯން ސްކީމް ތައާރަފްކޮށްދެއްވައި ދެއްކެވި ވާހަކަފުޅުގައެވެ. ބޯހިޔާވަހިކަމުގެ ސިޔާސަތުގެ އަމާޒާ ބެހޭ ގޮތުން ރައީސް ވިދާޅުވީ 4000 ފުލެޓު އެޅުމަށް ފައިސާ ހަމަޖެހިފައިވާކަމަށާއި މިހާރު ކުރަމުންއަންނަ މަސައްކަތަކީ އެ 4000 ފުލެޓް އަޅާނެ ބައެއް ހޯދުން ކަމަށެވެ.
މީގެ އިތުރުން ވެސް އިތުރު 7000 ފުލެޓުގެ މަސައްކަތް ފަށަން ތައްޔާރުވެފައިވާ ކަމަށާއި ދައުރު ނިމޭއިރު ވައުދުގެ ބޮޑުބައި ފުއްދާނެކަމަށް ރައީސް ވިދާޅުވިއެވެ.
ކުރީ ސަރުކާރުން އަޅައި ނިންމައިފައިވާ ހިޔާ ފުލެޓު ދިނުން ލަސްވެ އާއްމުންގެ ޝަކުވާތައް އިތުރުވެފައިވާއިރު އެ ފްލެޓްތައް ދިން ގޮތާމެދު ވެސް ގިނަ ބައެއްގެ ފާޑުކިޔުންް ވަނީ ސަރުކާރަށް އަމާޒުވެފައެވެ.
މި ސަރުކާރަށް ދެ އަހަރު ވެގެންދިޔައިރު ކެންޕެއިންގައިވެފައިވާ ބައެއް ވައުދުތައް ފުއްދިފައި ނުވާތީ ރައްޔިތުން ސުވާލު ކުރާ ކަމަށާއި ރިޔާސީ އިންތިހާބުގައި މާލެ ރައްޔިތުންނަށް ގޯތި ކަނޑައިފައި ދޭނެ ކަމަށް އެމްޑީޕީން ވައުދުވީ ނަމަވެސް އެ ގޯއްޗާއި ފްލެޓް ކޮބައިތޯ ރައްޔިތުން ސުވާލު ކުރާ ކަމަށް ރައީސް ނަޝީދު ވެސް ވަނީ ވިދާޅުވެފައެވެ.
ރާއްޖޭގައި ބޯހިޔާވަހިކަން ބޭނުންވާ މިންވަރާއި، ގޯތިގެދޮރުގެ މިލްކިއްޔާތު ލިބުމުގައި ދެކޭގޮތާއި ކުއްޔަށް އުޅޭ ފަރާތްތަކަށް ލުއި ފަސޭހަ މަގެއް ދެނެގަތުމަށް މިސަރުކާރުން ވަނީ މިދިޔަ ޑިސެމްބަރު މަހު ދިރާސާއެއް ހަދައިފައެވެ.
