އެކްޓަރަކަށް ވުމުގެ ކުރިން "ނައިތިކް" މަސައްކަތް ކުރީ ތަފާތު ދާއިރާއެއްގައި!
ސްޓާ ޕްލަސްއިން ދައްކާ އެންމެ ގިނަ ދުވަސްވީ ޑްރާމާ "ޔޭ ރިޝްތާ ކިޔާ ކެހެލާތާހޭ" އިން ބެލުންތެރިންގެ މަގްބޫލުކަން ހޯދި އެކްޓަރ ކަރަން މެހެރާ ނުވަތަ ޑްރާމާގެ ނަމުން ނަމަ ނައިތިކް އެކްޓަރަކަށް ވުމުގެ ކުރިން މަސައްކަތް ކުރީ ފާސްޓް ފުޑް ރެސްޓޯރެންޓެއްގައިކަމަށް ބުނާ ވީޑިޔޯއެއްް އޭނާގެ ފޭނުން އާއްމުކޮށްފިއެވެ.
ކަރަން ބުނާ ގޮތުން ގުރޭޑް 12ގައި ކިޔަވަމުން ދިޔައިރު އޭނާ މަސައްކަތް ކުރީ އިންޑިޔާގައި ހުންނަ ޑޮމިނޯގެ ރެސްޓޯރެންޓެއްގައި ޕިއްޒާ ހަދާށެވެ.
ކަރަންގެ އަންހެނުން ނިޝާ ރާވަލް ވަނީ މިދިޔަ މަހު 31 ވަނަ ދުވަހު ގެވެށި އަނިޔާގެ މައްސަލަ ފުލުހުންނަށް ހުށަހަޅާފައެވެ. ބޭރުގެ މީޑިއާތަކުން ރިޕޯޓް ކުރާ ގޮތުގައި މުންބާއީގެ ގޮރެގައުން ފުލުހުން މިހާރު މިމައްސަލަ ބަލަމުންނެވެ.
މީގެ ކުރިން ވެސް ކަރަން ނިޝާއަށް އަނިޔާ ކުރާ ކަމަށް ބުނާ ވާހަކަތަކެއް މީޑިއާގައި އަޑުތައް ވަނީ ފެތުރިފައެވެ. އެހެން ނަމަވެސް މިއީ މިފަދަ މައްސަލައެއް ރިޕޯޓް ކުރި ފުރަތަމަ ފަހަރެވެ. މީގެ ކުރިން މިފަދަ މައްސަލަތައް ފެންމަތިވި ނަމަވެސް އެކަމާ ގުޅޭ ގޮތުން ކަރަން އެއްޗެއް ބުނެފައެއް ނުވެއެވެ.
ބައެއް މީޑިއާތަކުން ބުނީ އެ ދެ މީހުންގެ ދޭތެރޭގައި ހިނގި ހޫނު ޒުވާބުގަނޑަކަށް ފަހު ކޮޓަރީގެ ފާރާ ދިމާއަށް ނިޝާ ކޮއްޕާލުމުން، ފާރުގައި ބޯޖެހި އޭނާ ބޯ ފަޅައިގެން ގޮސްފައިވާ ކަމަށެވެ. އަދި ކަރަށް ވެސް އެކިވަރުގެ އަނިޔާ ލިބިފައިވާ ކަމަށް ރިޕޯޓްތައް ބުނެއެވެ.
އެހެން ނަމަވެސް ކަރަން ބުނެފައި ވަނީ ނިޝާގެ ބޯ ފަޅައިގެން ދިޔައީ އަމިއްލައަށް ފާރުގައި ބޯ ޖެހުުމުންކަމަށެވެ. ދެމީހުންގެ މެދުގައި މައްސަލަ ހޫނުވެ ދެމީހުން ވެސް މިހާރު ވަނީ ވަރިވާން ނިންމައިފައެވެ.
