ޖަލްސާތައް އަލުން މަޖިލިސް ތަޅުމަށް!
ކޮވިޑް-19އާ ގުޅިގެން ސަރުކާރުން އަޅައިފައިވާ ފިޔަވަޅުތަކަށް މާދަމާ އިން ފެށިގެން ލުއިތައް ދޭން ނިންމުމުން، އަންނަ ހަފްތާއިން ފެށިގެން ރައްޔިތުންގެ މަޖިލީހުގެ ޖަލްސާތައް އަލުން އެ މަޖިލީހުގެ ތަޅުމުގައި ބާއްވަން ފަށަން ނިންމައިފިއެވެ.
މިއަދުގެ ޖަލްސާ ފައްޓަވަމުން ރިޔާސަތުން ވިދާޅުވާ ވާހަކަތަކުގެ ތެރެއިން ފުރަތަމަ ވާހަކައަކަށް ފާހަގަކޮށްފައި ވަނީ އިއްޔެ ސަރުކާރުގެ ފަރާތުން އިއުލާން ކުރި ލުއިތަކުގެ ވާހަކައެވެ. އެހެންކަމުން އަންނަ ހަފްތާއިން ފެށިގެން މަޖިލިހުގެ ޖަލްސާތައް އެ މަޖިލީހުގެ ތަޅުމުގައި ބޭއްވެން ފެށޭނެ ކަމަށް ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲ ވިދާޅުވިއެވެ.
މިއަދުގެ ޖަލްސާގައި އީވާ ވިދާޅުވީ މުޅި އަހަރުތެރޭގައި މަޖިލީހުގެ ޖަލްސާތައް ބާއްވަމުން ދިޔައީ ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ގައިޑްލައިނާ އެއްގޮތަށް މާސްކުއަޅައި ގައިދުރުކޮށްގެން އަދި މަޖިލީހުގެ އެތެރޭގައި ހޭދަކުރާ ވަގުތުތައް ވެސް ވީހާ ވެސް ކުޑަކޮށްގެން ކަަމަށެވެ. ހަލުވިކަމާ އެކު ކޮވިޑް-19 ފެތުރެމުން ދިޔުމާ ގުޅިގެން މަޖިލިސް ޖަލްސާތައް މިހާރު ބާއްވަމުން އަންނަނީ އޮންލައިން ކޮށެވެ.
އެހެން ނަމަވެސް އަންނަ ހަފްތާއިން ފެށިގެން ފިޒިކަލީ ކުރަން ޖެހޭ މަސައްކަތްތައް ކުރުމަށް މަޖިލިސް ތަޅުމުގައި ޖަލްސާތައް ބޭއްވޭތޯ ބައްލަވާނެކަމަށް އީވާ ވިދާޅުވިއެވެ.
"އިއްޔެ ސަރުކާރުގެ ފަރާތުން އިއުލާންކުރި ލުއިތަކާ ގުޅިގެން، އަޅުގަނޑު މި ގަބޫލުކުރަނީ އަންނަ ހަފްތާއިން ފެށިގެން މަޖިލީހުގެ ތަޅުމުގައި ޖަލްސާތައް ފެށޭނެ ކަމަށް" ރައްޔިތުންގެ މަޖިލީހުގެ ނައިބު ރައީސް ވިދާޅުވިއެވެ.
ޖަލްސާތައް މަޖިލީހުގެ ތަޅުމުގައި ބޭއްވުމާ މެދު ހެލްތު މިނިސްޓަރު އަހުމަދު ނަސީމްއާ މަޝްވަރާ ކުރައްވަމުން ގެންދަވާ ކަމަށް އީވާ ވިދާޅުވިއެވެ. އަދި އެކަން ކުރައްވާނީ ހެލްތު މިނިސްޓަރު ދެއްވާ އިރުޝާދުގެ މަތިން ކަމަށް ވެސް އޭނާ ވިދާޅުވިއެވެ.
