ދުވަސްތަކަކަށް ފަހު މަޖިލީހުގެ ޖަލްސާތައް ތަޅުމުގައި ފަށައިފި
ރާއްޖޭގެ ކޮވިޑް19ގެ ހާލަތު ގޯސްވެ ރައްޔިތުން މަޖިލީހުގެ ޖަލްސާތައް ދުވަސްތަކެއް ވަންދެން އޮންލައިންކޮށް ކުރިއަށް ގެންދިޔުމަށް ފަހު، އަލުން ތަޅުމުގައި ޖަލްސާތައް ފަށައިފިއެވެ.
ކޮވިޑްގެ ހާލަތު ގޯސްވެ މަޖިލީހުގެ ޖަލްސާތައް އޮންލައިންކޮށް ކުރިއަށް ގެންދަން ނިންމީ މި ދިޔަ މެއި މަހުގެ 24 ގައެވެ. މިި ދުވަސްތަކުގައި މަޖިލީހުގައި މުހިއްމު މަސައްކަތްތަކެއް ވަނީ ކުރިއަށް ގެންގޮސްފައެވެ. މިގޮތުން އެންމެ ފާހަގަ ކޮށްލެވުނު މަސައްކަތަކީ ފާޑުކިޔުން ބޮޑުވެ މައްސަލަ ބޮޑުވެފައިވާ ނަފްރަތުގެ ބިލެވެ. އާންމުތަނެއްގައި މުސްލިމަކު ކާފަރެއްގެ ގޮތުގައި ސިފަ ކުރުމާއި، ސިފަކުރުމުގައި ބައިވެރި ވުމާއި މުސްލިމަކަށް ކާފަރެއްކަމުގެ ތުހުމަތު ކުުރުމަކީ ކުށަކަށް ހެދުމަށް ގާނޫނުލްއުގޫބާތަށް އިސްލާހު ގެނައުމަށް ރައްޔިތުންގެ މަޖިލީހަށް ތުޅާދޫ ދާއިރާގެ މެމްބަރު ހިސާން ހުށައެޅުއްވި މި ބިލާ މެދު އާއްމުންގެ ފާޑުކިޔުންތައް ވަނީ ވަރަށް ބޮޑަށް އިތުރުވެފައެވެ.
މީގެ އިތުރުން ޓެރަރިޒަމް މަނާކުރުމުގެ ގާނޫނަށް ބަދަލުގެންނަން ހުށަހެޅި ބިލްގެ މަސައްކަތް ވެސް އޮންލައިންކޮށް ކުރިއަށް ގެންގޮސްފައި ވެއެވެ.
މަޖިލީހުގެ ޖަލްސާތައް ތަޅުމުގައި ކުރިއަށްގެންދަން މިއަދު ފަށައިފައި މި ވަނީ ރާއްޖޭގެ ކޮވިޑްގެ ހާލަތު ރަނގަޅުވެ، ހެލްތު ޕްރޮޓެކްޝަން އެޖެންސީން އަޅައިފައިވާ ފިޔަވަޅުތަކަށް ލުއި ދިނުމުންނެވެ.
