ނަފުރަތުގެ ބިލް ދިފާއުކުރެއްވުމަށް ސަރުކާރުން ނުނުކުންނެވީތީ ހިތާމަ ކުރަން: އިންތި
ސަރުކާރުން ފޮނުވައިގެން ތުޅާދޫ ދާއިރާގެ މެމްބަރު ހިސާން ހުސައިން ގާނޫނުލްއުގޫބާތަށް އިސްލާހު ގެނައުމަށް ހުށަހެޅުއްވި ނަފުރަތުގެ ބިލް ދިފާއުކުރައްވަން ސަރުކާރުން މަސައްކަތް ނުކުރި ކަމަށާއި އެކަމާ ހިތާމަ ކުރައްވާ ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
އަގީދާއާ ގުޅުވައިގެން ނަފުރަތު އުފެއްދުމަކީ ކުށަކަށް ހެދުމަށް ހުށަހެޅި އިސްލާހް މަޖިލީހުގެ ޖުޑިޝަރީ ކޮމިޓީން ދިރާސާކޮށް ނިންމި ގޮތުގެ ރިޕޯޓް މަޖިލީހުގެ މިއަދުގެ ޖަލްސާއަށް ހުށަހަޅުއްވަމުން އިންތި ވިދާޅުވީ، މި ބިލް ރައްޔިތުންގެ މަޖިލީހަށް ހުށަހެޅުއްވީ ސީދާ ސަރުކާރުން ކަމަށާއި އެހެން ނަމަވެސް ބިލް ހުށަހެޅުއްވުމަށް ފަހު ކަންތައް ކުރި ގޮތުން ވަރަށް ބޮޑަށް ހިތާމަ ކުރައްވާ ކަމަށެވެ.
"މި ބިލު ސަރުކާރުގެ ފަރާތުން ހުށަހެޅުއްވުމަށް ފަހު ބިލު ދިފާއު ކުރެއްވުމަށް ސަރުކާރުން ނުކުންނެވި ތަން ނުފެންނާތީ އަޅުގަނޑު އިންތިހާއަށް ކަންބޮޑުވަން" އިންތި ވިދާޅުވިއެވެ.
އިންތި ވިދާޅުވީ، ސަރުކާރުން މި ބިލް ހުށަހެޅުއްވީ އެއީ ކޮންމެހެން ކުރަން ޖެހޭ ކަމެއްގެ ގޮތުގައި ޤަބޫލު ކުރެވިގެން ކަމަށާއި އެއީ މުޖުތަމައުގެ ތެރޭގައި މީހުންނަށް ހައްޤުން ކަމަކާ ނުލައި ކާފަރަށް ގޮވުމާއި މީހުންނަކީ ދީނުން ބޭރުވެފައިވާ މީހުންގެ ގޮތުގައި ބުނުމުން ދެން ނިކުންނަ ނަތީޖާގެ ސަބަބުން ކަމަށެވެ.
"މިކަންކަމާ ގުޅުވައިގެން ނަފްރަތު އުފައްދާ މީހުން ޤަތުލުކޮށްފައި މި މުޖުތަމައުގައި އެބަތިބި. މި މަޖިލީހުގެ މެންބަރަކު އަވަހާރަކޮށްލައިފައި އެބަހުރި. މަޖިލީހުގެ ރައީސަށް ހަމަލާދީފައި އެބަހުރި. ޒުވާނުން ގެއްލުވައިލައިފައި އެބަތިބި" އިންތި ވިދާޅުވިއެވެ.
ސަރުކާރަށް ފާޑު ވިދާޅުވަމުން އިންތި ވިދާޅުވީ، ބިލް ހުށަހެޅި މީހާއާއި ބިލް ދިރާސާ ކުރި ފަރާތްތަކަށް މިއަދު ނުރައްކާ ކުރިމަތިވާ ކަމަށާއި އެގޮތަށް ކަންތައްވާން ސަރުކާރުން ދޫކޮށްލުމުން ހިތާމަކުރައްވާ ކަމަށެވެ. އަދި ސަރުކާރުން ކަމެއް ކުރަން ނިންމައި ސްޓޭންޑެއް ނަގައިފިނަމަ އެ ސްޓޭންޑެއްގައި ހުންނަން ޖެހޭނެ ކަމަށާއި އެހެން ނޫން ނަމަ ރައްޔިތުންނަށް ސަލާމަތެއް ނެތް ކަމަށް ވިދާޅުވިއެވެ.
"ސަރުކާރުގެ ސްޓޭންޑް ވަރުގަދަވާން ޖެހޭނެ. ސްޓޭންޑެއް ނަންގަވައިފިއްޔާ ހުންނަވަން ޖެހޭނެ. އަމާޒެއް ހުންނަން ޖެހޭނެ. އެހެން ނޫނީ ރައްޔިތުންނަށް ސަލާމަތެއް ނެތް" އިންތި ވިދާޅުވިއެވެ.
ތިޔަގިންތއެއްނު ޔާމީނުމަރަން ގޮވާ މައުމޫނުމަރަން ގޮވާއެންމެގިނަމީހުންގެ އަގުވަށްޓައި އެއްވުންތަކުގައި ނަފްރަތު އުފެއްދުމަށް ހިތްވަރުދިނީ ވަރަށްސާފް