ރައީސް ޔާމީންގެ ޝަރީއަތް: ހުށަހެޅުންތަކަށް 10 ދުވަސް

މިއަދު ކުރިޔަށް ދިޔަ އަޑުއެހުމަކީ ރ.ފުއްގިރި ވިއްކައިލުމުގެ މުއާމަލާތާ ގުޅިގެން އުފުލައިފައިވާ ދެ ދައުވާގެ ޝަރީޢަތުގެ އަޑުއެހުމެކެވެ. މި މައްސަލާގައި ރައީސް ޔާމީނުގެ މައްޗަށް ޕްރޮސެކިއުޓާ ޖެނެރަލް ވަނީ 2 ދައުވާއެއް އުފުއްލަވައިފައެވެ. އެއީ ރިޝްވަތުގެ ގޮތުގައި ފައިސާ ނެންގެވި ކަމުގެ ތުހުމަތުގައި އުފުލައިފައިވާ ދައުވާއަކާއި އެމްޑީއޭގެ ރައީސް އަޙްމަދު ސިޔާމް (ސަން)ގެ ކުންފުނިތަކެއް މެދުވެރިކޮށް އެ ފައިސާ ލޯންޑާކުރި ދައުވާއެވެ. މި ދަޢުވާ ރައީސް ޔާމީން ވަނީ އިންކާރު ކުރައްވައިފައެވެ.

މިއަދު މި މައްސަލައިގައި ދައުލަތުން ހުށަހަޅާ ހެއްކާއި ދިފާޢުން ހުށަހަޅާ ހެކިތައް ހާމަކޮށްފައެވެ. މިގޮތުން ދައުލަތުގެ ފަރާތުން 82 ހެކި ހުށަހެޅިއިރު، ރައީސް ޔާމީންގެ ފަރާތުން ދިފާއުގައި 30 ހެކި ހުށަހެޅިއެވެ. ދިފާއުން ހުށަހެޅީ ފަސް ޝަފައީ ހެއްކަކާއި 25 ކިތާބީ ހެއްކެކެވެ.

ރައީސް ޔާމީން މިހާރު ވެސް ދަނީ ފަސް އަހަރުގެ ހުކުމެއް ތަންފީޒް ކުރައްވަމުންނެވެ. އެއީ އެމަނިކުފާނުގެ މައްޗަށް އެމްއެމްޕީއާރްސީ މެދުވެރިކޮށް، ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ލޯންޑާ ކުރި ކަމަށް ބުނާ މައްސަލައެކެވެ.