ވެކްސިންގެ ފުރަތަމަ ޑޯޒް 50 އިންސައްތަ އަށްވުރެ ގިނަ ދަރިވަރުން ޖަހައިފި
ކޯވިޑުން ދިފާޢުވުމަށް ޖަހާ ވެކްސިންގެ ފުރަތަމަ ޑޯޒް 50 އިންސައްތައަށް ވުރެ ގިނަ ދަރިވަރުން ޖަހައިފިއެވެ.
އެޑިއުކޭޝަން މިނިސްޓްރީން ވިދާޅުވީ މާލެއާއި އަތޮޅުތަކުގެ ސްކޫލްތަކުގެ، ޢުމުރުން 12އަހަރާއި 17 އަހަރާ ދެމެދުގެ ދަރިވަރުންގެ ތެރެއިން، 20،239 ދަރިވަރަކު މިހައިތަނަށް ކޯވިޑުން ދިފާޢުވުމަށް ވެކްސިންގެ ފުރަތަމަ ޑޯޒް ޖަހައިފައިވާ ކަމަށެވެ. އަދި މިއީ ރާއްޖޭގެ ދަރިވަރުންގެ ރައްކާތެރި ކަމަށް ކުރެވެމުންދާ މަސައްކަތަށް ލިބުނު ބޮޑު ކާމިޔާބީއެއް ކަމަށް މިިނިސްޓްރީން ވިދާޅުވެއެވެ. ޢުމުރުން 12އަހަރާއި 17 އަހަރާ ދެމެދުގެ ދަރިވަރުންނަށް ކޯވިޑް ވެކްސިން ޖަހަން ފަށައިފައި ވަނީ މިމަހުގެ 15 ވަނަ ދުވަހުއެވެ.
މިމަހުގެ ނިޔަލަށް ހުރިހާ ދަރިވަރުންނަށް ވެކްސިން ޖަހާ ނިންމައިލުމަކީ އަމާޒެއް ކަމަށް އެޑިއުކޭޝަން މިނިސްޓްރީން ވިދާޅުވެއެވެ.
ރާއްޖޭގައި ކޮވިޑް-19އިން ރައްކާތެރިވާ ވެކްސިން ޖެހުމުގެ ބޮޑު ޕްރޮގްރާމެއް ސަރުކާރުން ފަށައިފައިވާއިރު ވެކްސިން ނުޖަހާ މީހުންނާ މެދު ތަފާތު އުސޫލަކުން އަމަލު ކުރުމުގެ އުސޫލެއް ވެސް އެޗްޕީއޭއިން ވަނީ އެކުލަވައިލައިފައެވެ.
