ގަވާއިދާ ހިލާފަށް ބިދޭސީއަކު ޑައިވިން ސެޝަންތަކެއް ނަގައިދޭ މައްސަލައެއް
ގަވާއިދާ ހިލާފަށް ބިދޭސީއަކު ފްރީ ޑައިވިން ސެޝަންތަކެއް ނަގައިދޭ މައްސަލައެއް ފެންމަތިވެއްޖެއެވެ.
އެނގިފައިވާ ގޮތުގައި އެ ބިދޭސީ މީހާ ޑައިވިން ސެޝަންތައް ނަގައިދެނީ ސަލާމަތީ ފިޔަވަޅުތައް ވެސް ނާޅައެވެ.
މިކަމާ ގުޅޭގޮތުން މޯލްޑިވްސް ފްރީޑައިވް އެސޯސިއޭޝަނުން މިއަދު ނެރުނު ބަޔާނެއްގައި ބުނެފައި ވަނީ، ސަލާމަތީ ފިޔަވަޅުތައް ނާޅައި އަދި މިކަމާ ގުޅޭ އިދާރާތަކުން އެފަދަ ޓްރެއިނިންއެއް ދިނުމުގެ އެއްވެސް ސެޓްފިކެޓެއް ނެތް ބިދޭސީއަކު ފްރީ ޑައިވިން ޓްރެއިނިން ސެޝަންތަކެއް ނަގައިދޭ ކަމުގެ ޝަކުވާ ލިބިފައިވާ ކަމަށެވެ.
ރާއްޖޭގައި ފްރީ ޑައިވިން ޓްރެއިނިންތައް ނަގައިދޭ ސެޓިފައިޑް ޓްރެއިނިން ސްކޫލެއް އަދި އެސޯސިއޭޝަނަކާ ވެސް، މި މީހާއާ އެއްވެސް ގުޅުމެއް ނުވާ ކަމަށް އެ އެސޯސިއޭޝަނުން ބުނެފައިވެއެވެ.
އެހެންކަމުން، މިފަދަ އެއްވެސް ޓްރެއިނިން ޕްރޮގުރާމެއްގައި ބައިވެރިވުމުގެ ކުރިން، އެއީ ސެޓިފައިޑް ފަރާތެއްތޯ ކަށަވަރުކުރުމަށް، އެ ބަޔާނުގައި އެދިފައިވެއެވެ.
އެ އެސޯސިއޭޝަނުން އިތުރަށް ބުނެފައި ވަނީ ސެޓްފިކެޓެއް ނެތި އަދި ތަޖުރިބާއެއް ނެތި މިފަދަ މީހުން ދޭ ޓްރެއިނިން ސެޝަންތަކުގައި ބައިވެރިވުމުގެ ސަބަބުން ފުރާނައަށް ނުރައްކާވާ ފަދަ ކަމެއް ދިމާވެދާނެ ކަމަށެވެ.
އެނގިފައިވާ ގޮތުގައި ގަވާއިދާ ހިލާފަށް ފްރީ ޑައިވިން ސެޝަންތައް ނަގައިދޭ މި ބިދޭސީ މީހާއަކީ މީގެ ކުރިން ވެސް އެހެން ބައެއް ގައުމުތަކުގައި އެފަދަ ސެޝަންތައް ދީގެން މައްސަލަ ޖެހިފައިވާ މީހެކެވެ.
މި މީހާއާ މެދު އެއްވެސް ފިޔަވަޅެއް އަޅައިފައިވާ ކަމުގެ އެއްވެސް މައުލޫމާތެއް އަދި ލިބިފައެއް ނުވެއެވެ.
