މާލޭ ސިޓީ ކައުންސިލުގެ މިދިޔަ މަހުގެ ރިޕޯޓް: އުމްރާނީ މަސައްކަތްތައް ގިނަ
ފާއިތުވި މަސްދުވަހު މާލޭ ސިޓީ ކައުންސިލުން އެންމެ ގިނައިން ކޮށްފައި ވަނީ އުމްރާނީ ކަންކަމާ ގުޅުން ހުރި މަސައްކަތްތައް ކަމަށް އެ އިދާރާއިން ކޮށްފައިވާ މަސައްކަތްތަކުގެ ހުލާސާ ރިޕޯޓުން ދައްކައިފިއެވެ.
މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ޓްވީޓްކޮށްފައިވާ މި ރިޕޯޓުން ދައްކާ ގޮތުގައި އެ އިދާރާއިން ވަނީ 2212 މަސައްކަތެއް ކޮށްފައެވެ. މީގެ އެތެރެއިން އެންމެ ގިނަ އަދަދަކަށް ކޮށްފައިވާ މަސައްކަތަކީ އުމްރާނީ މަސައްކަތްތަކަށް ދޫކުރާ ބޯޑް ދޫކުރުމުގެ މަސައްކަތެވެ. މިގޮތުން މި މުއްދަތުގެ ތެރޭގައި 1092 ބޯޑް އެއިދާރާއިން ވަނީ ދޫކޮށްފައެވެ. ހަމައެހެންމެ 335 ފަރާތަކަށް މަގު ކޮނުމުގެ ހުއްދަ ދީފައިވާއިރު 443 ސާފުކޮށްފައިކަމަށް މި ރިޕޯޓުން ދައްކައެވެ.
މާލެ ސިޓީ ކައުންސިލުން 690 ސައިކަލު ޒޯން ކުރަހައިފައިވާއިރު 125 ކާރު ޒޯން ވަނީ ކުރަހައިފައެވެ. އަދި ހާއްސަ އެހީއަށް ބޭނުންވާ ކުދިންނަށް 4 ޒޯނެއް ވަނީ ކުރަހައިފައެވެ.
ތަފާސް ހިސާބުތަކުން ދައްކާގޮތުގައި މާލޭސިޓީގެ ލޭންޑް އެންޑް އިންފްރަސްޓްރަކްޗާއާ ގުޅުން ހުރި 405 ކަމެއް އެ އިދާރާއިން ވަނީ ނިންމައިފައެވެ. މީގެ ތެރޭގައި އިމާރާތާއި ގޯތީގެ ރެޖިސްޓްރީއާ ގުޅުން ހުރި ކަންކަމާއި ގޯތީގެ ނަން ފާސް ކުރުން، އިން ވަކިކުރުން، ރަހުނު ރަޖިސްޓްރީ ކުރުން އަދިވެސް އިތުރު އެހެނިހެން ކަންކަން އެއިދާރާއިން ވަނީ ކޮށްފައެވެ.
ސިޓީ ކައުންސިލުގެ މަސައްކަތްތަކުގެ ތެރެއިން އިޖްތިމާއީ ކަންކަމާ ގުޅުން ހުރި 1635 ކަމެއް އެއިދާރާއިން ވަނީ ނިންމައިފައެވެ. މީގެ ތެރޭގައި 662 ކާނަށް މަދިރި ބޭސް އެޅުމާއި މަދިރި ކޮންޓްރޯލް ކުރުމުގެ ގޮތުން 742 ތަނެއް ބަލާފައިވާކަމަށް ތަފާސް ހިސާބުތަކުން ދައްކައެވެ.
