ތިލަފުށީގައި ކުނި އެންދުން ހުއްޓައިލައި ކުނި މެނޭޖްކުރުން ޒަމާނީ ކުރަނީ
ކުރިއަށް އޮތް ދެ މަސް ތެރޭ ތިލަފުށީގައި ކުނި އެންދުން ހުއްޓައިލައި ކުނި މެނޭޖްކުރުން ޒަމާނީ ކުރަން އެންވަޔަރަމަންޓް މިނިސްޓްރީން ނިންމައިފިއެވެ.
ތިލަފުށީގައި ކުރާ މަސައްކަތްތައް ބައްލަވައިލެއްވުމަށް މިދިޔަ ބުރާސްފަތި ދުވަހު އެ ރަށަށް ޒިޔާރަތް ކުރެއްވުމަށް ފަހު އެންވަޔަރަމަންޓް މިނިސްޓަރު އައިމިނަތު ޝައުނާ ވިދާޅުވީ އެތަނުގެ ކުނިފުނިން ދުން އެރުމުގެ ސަބަބުން މާލެ އާއި ކައިރި ރަށްތަކުގެ ރައްޔިތުންނާއި ފަތުރުވެރިންނަށް ވެސް އޭގެ އުނދަގޫ ފޯރާ ކަމަށެވެ. ނަމަވެސް އެ މިނިސްޓްރީގެ އަމާޒަކީ އޮކްޓޯބަރު މަހުގެ ނިޔަލަށް ކުނި އެންދުން ހުއްޓައިލުން ކަމަށް ވެސް މިނިސްޓަރ ވިދާޅުވިއެވެ.
"އަޅުގަނޑުމެންގެ އަމާޒަކީ އޮކްޓޯބަރު މަހުގެ ނިޔަލަށް ކުންފުނިން އަރާ ދުން އެއްކޮށް ނިވައިލާ، އެކަން ނިމުމަކަށް ގެނައުން. އެއަށް ފަހު އަޅުގަނޑުމެންގެ އަމާޒަކީ މިތަނަކީ ދުނިޔޭގެ އެހެން ތަންތަނުގަ ވެސް މިފަދަ ޑަމްޕްސައިޓްތައް ހުންނަ ގޮތަށް ރިމީޑިއެޓް ކުރެވި، ގްރީން ސްޕޭސްއެއްގެ ގޮތުގަ ފެނިގެން ދިޔުން" މިނިސްޓަރ ޝައުނާ ވިދާޅުވިއެވެ.
މި މަސައްކަތަކީ އެންވަޔަރަމެންޓް މިނިސްޓްރީން ވޭސްޓް މެނޭޖްމަންޓް ކޯޕަރޭޝަން (ވެމްކޯ)އާ ގުޅިގެން އަދި އޭޝިއަން ޑިވެލޮޕްމަންޓް ބޭންކް (އޭޑީބީ)ގެ ފަންނީ ލަފަޔާއި އެހީގެ ދަށުން ކުރިޔަށް ގެންދާ މަސައްކަތެކެވެ. އަދި އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ)އާއި ޖަޕާން ފަންޑް ފޯ ޖޮއިންޓް ކްރެޑިޓް މެކޭނިޒަމް (ޖޭއެފްޖޭސީއެމް)ގެ އެހީވެސް އެ މަޝްރޫއަށް ލިބޭނެއެވެ.
މިނިސްޓަރ ޝައުނާ އިތުރަށް ވިދާޅުވީ އެ މަސައްކަތުގެ ދަށުން ތިލަފުށީގައި ކުނި މެނޭޖު ކުރުމަށް ޒަމާނީ ޓެކްނޮލޮޖީ ތައާރަފް ކުރާނެ ކަމަށާއި ރާއްޖޭގެ ކުނި ނައްތާލުމުގެ ނިޒާމު ވެސް ޒަމާނީ ކުރާނެ ކަމަށެވެ.
ދެން އަތޮޅުތަކުގައި ކުނިފަރުބަދަ ހުއްޓަސް ހެޔޮވަނީތޯ މާލެޔަށްތޯ ހުރިހާ ކަމެއް ފުރިހަމަވާން ޖެހޭނީ؟