އަބޫދާބީގެ ގްރީން ލިސްޓަށް އަނެއްކާ ވެސް ރާއްޖެ
އެކުވެރި އަރަބި އިމާރާތް (ޔޫއޭއީ)ގެ ވެރިރަށް އަބޫދާބީގެ ގްރީން ލިސްޓަށް އަނެއްކާ ވެސް ރާއްޖެ އިތުރުކޮށްފިއެވެ.
ކޮވިޑް-19އާ ގުޅިގެން ބަންދު ކުރުމަށް ފަހު، ގިނަ ދުވަސްތަކެއް ފަހުން ކަރަންޓީނުވުމަކާ ނުލައި އަބޫދާބީއަށް އެތެރެވެވޭ ޤައުމުތަކުގެ ލިސްޓުގައި ރާއްޖެ ފުރަތަމަ ހިމެނުނީ މިއަހަރުގެ ޖުލައި މަހު ފަހުކޮޅުގަވެ. ނަމަވެސް މި މަހު އެ ޤައުމުން އާންމު ކުރި ލިސްޓުން ވަނީ ރާއްޖެ އުނިކޮށްފައެވެ.
ނަމަވެސް މި ފެށޭ ސެޕްޓެމްބަރު މަހުގެ 1ވަނަ ދުވަހުން ފެށިގެން، އަނެއްކާ ވެސް ރާއްޖެއިން އަބޫދާބީއަށް ކަރަންޓީނު ވުމަކާ ނުލައި އެތެރެވެވޭނެ ކަމަށް އެމްބަސީން ވަނީ ހާމަކޮށްފައެވެ.
މިފަހަރު އަބޫދާބީން ނެރުނު ގްރީން ލިސްޓުގައި ރާއްޖެއާ އެކު 55 ޤައުމެއް ހިމެނެއެވެ. މިފަހަރު އިތުރު ކުރި ޤައުމުތަކުގެ ތެރޭގައި ބޫޓާން، ކްރޮއޭޝިއާ، ގްރީސް އަދި ޖަޕާން ވެސް ހިމެނެއެވެ.
ގްރީން ލިސްޓުގައި ހިމެނޭ ގައުމުތަކުން އަބޫދާބީއަށް ކަރަންޓީނުވުމަކާ ނުލާ އެތެރެވެއެވެ. އެހެން ނަމަވެސް ނައްސި ޕީސީއާރު ޓެސްޓުގެ ނަތީޖާއެއް ހުށަހަޅަން ޖެހެއެވެ. އަދި ހަވަނަ ދުވަހު ވެސް ޕީސީއާރު ޓެސްޓެއް ވެސް ހަދަން ޖެހެއެވެ.
