ހައެއް ފަހެއްގެ ހަމަލާ: އިސްހާގާއި ފަހުމީގެ ބަންދުގެ މުއްދަތު އިތުރުކޮށްފި
ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދު އަވަހާރަކޮށްލަން އަމާޒުކޮށް މެއި މަހުގެ ހަވަނަ ދުވަހު ދިން ނިރުބަވެރި ހަމަލާއާ ގުޅިގެން ހައްޔަރުކުރި ދެ މީހެއްގެ ބަންދުގެ މުއްދަތު އިތުރުކޮށްފިއެވެ.
މި މައްސަލައިގައި ބަންދުގެ މުއްދަތު އިތުރު ކޮށްފައި ވަނީ އިސްހާގާއި ފަހުމީ އަލީ ގެއެވެ. މި ދެ މީހުންގެ ވެސް ބަންދުގެ މުއްދަތު 14 ދުވަހަށް އިތުރު ކޮށްފައި ވަނީ އިއްޔެއެވެ.
ރައީސް ނަޝީދަށް އަމާޒުކޮށް ދިން މި ހަމަލާގެ ތަހުގީގުގައި ފުލުހުން މީގެ ކުރިން ވިދާޅުވެފައި ވަނީ، މި މައްސަލައިގައި ހައްޔަރު ކޮށްފައިވާ އިސްހާގަކީ ހަމަލާ ރާވައި ހިންގުމުގައި އިސް ދައުރެއް އަދާކުރި މީހެއް ކަމަށެވެ. އަދި ބޮން ގޮއްވައިލި އަދުހަމް އަހުމަދު ރަޝީދު ތައްޔާރުކުރުމުގައި އެންމެ އިސްކޮށް ހަރަކާތްތެރިވީ ވެސް އިސްހާގުކަމަށް އެއިރު ފުލުހުން ވިދާޅުވެފައިވެއެވެ. ފަހުމީއަކީ ވެސް ހަމަލާގައި އެކި ދައުރު އަދާކޮށްފައިވާ މީހެކެވެ.
މެއި މަހުގެ ހަވަނަ ދުވަހުގެ ރޭ ރައީސް ނަޝީދަށް ދިން ހަމަލާއާ ގުޅިގެން ހައްޔަރުކުރި 10 މީހުންގެ ތެރެއިން، ޢަމަލީ ގޮތުން ބައިވެރިވި ކަމުގެ ތުހުމަތުގައި ދައުވާ ކޮށްފައި ވަނީ ހަތަރު މީހަކަށެވެ. އެއީ ވ. ތިނަދޫ، ހިޔާ، އަދުހަމް އަހުމަދު ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ނ. މަނަދޫ، ނޫރީގެ އަލީ ހައިޝަމްގެ މައްޗަށެވެ.
Ads by STO
