މިފަހަރު ގުރޭޑް 8 ގެ އިސްލާމް ފޮތުގައި އާޔަތުގެ މާނަ ނުބައިކޮށް!
ރާއްޖޭގެ ސުކޫލުތަކުގައި ކިޔަވައިދޭން އެޑިއުކޭޝަން މިނިސްޓްރީން ފޮނުވައިފައިވާ ފޮތްތަކުގައި ގުރުއާނުގެ ބައިގައި ބޮޑެތި މައްސަލަތަކެއް ހުރިކަން ފާހަގަވެ އެކަން މިނިސްޓްރީގެ ސަމާލުކަމަށް އައިސްފައި ވަނިކޮށް އަނެއްކާ ވެސް އިސްލާމް ފޮތެއްގައި އިތުރު މައްސަލައެއް އޮތްކަން ފާހަގަވެއްޖެއެވެ.
ފޮތްތަކުގައި ހުރި މައްސަލަތައް އެންމެ ފުރަތަމަ އާއްމުންގެ ސަމާލުކަމަށް ގެނެސްފައިވާ ޑރ. މުހައްމަދު ޝަހީމް އަލީ ސައީދު މިރޭ ކުރެއްވި ޓްވީޓެއްގައި ވިދާޅުވީ ގުރޭޑް 8ގެ އިސްލާމީ ތަރުބިއްޔަތު ފޮތުގައި އާޔަތެއްގެ މާނަ ލިޔެވިފައި އޮތީ ނުބައިކޮށް ކަމަށެވެ.
"އިސްލާމީ ތަރުބިއްޔަތު ގުރޭޑް 9. ޕޭޖް 122. އާޔަތުގެ މާނަ ނުބައިކޮށް" ފޮޓޯއާއެކު ޑރ ޝަހީމް ކުރެއްވި ޓްވީޓްގައި ވިދާޅުވިއެވެ.
ގްރޭޑްތަކުގެ އިސްލާމް އަދި ޤުރްއާން ފޮތްތަކުގައި ހުރި އާޔަތްތަކުގައި ކުށް ޖެހުނީ ކިހިނެއްކަން ބަލައި، އެކަމާ މެދު ފިޔަވަޅު އަޅަން ނިންމައިފައިވާ ކަމަށް އެޑިއުކޭޝަން މިނިސްޓަރ ޑރ. އައިޝަތު ޢަލީ ވިދާޅުވެފައިވަނީ މިއަދުއެވެ.
އެޑިއުކޭޝަން މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުމުގައި މިނިސްޓަރ ވިދާޅުވީ، ފޮތްތަކުގައި ކުށްޖެހިފައިވާ ގޮތް ބެލުމަށް ކޮމިޓީއެއް އެކުލަވައިލައިފައިވާ ކަމަށާއި މިކަމުގައި އިހުމާލުވީ ފަރާތްތަކާ މެދު ފިޔަވަޅު އަޅަން ނިންމައިފައިވާ ކަމަށެވެ.
ޑރ. އައިޝަތު އަލީ އިތުރަށް ވިދާޅުވީ މިފަދަ ކުށްތައް ތަކުރާރުވިޔަ ނުދިނުމަށް މިހާރު ގިނަ ފިޔަވަޅުތަކެއް ވެސް އަޅައިފައިވާ ކަމަށާއި އެގޮތުން މިހާރަށް ވުރެ ބޮޑަށް ކުށްތައް ހުރިތޯ ބަލައި، އިސްލާހު ކުރުމުގެ ކަންކަން ވެސް ކުރިއަށް ގެންދިޔުމަށް ނިންމައިފައިވާ ކަމަށެވެ.
މީގެ އިތުރުން މިނިސްޓަރ ވިދާޅުވީ މިހާރު ކުށް ޖެހިފައިވާ ފޮތްތަކަކީ 2015ވަނަ އަހަރު ޗާޕު ކުރި ފޮތްތަކެއް ކަމަށާއި އެހެން ނަމަވެސް ކުރިން އެ ކުށްތައް ފާހަގަ ނުވެ، މިހާރު ފާހަގަވީ ކަމަށެވެ. ނަމަވެސް ކުށްތައް ހުރި ބައެއް ފޮތްތަކުގެ ފުރަތަމަ ޗާޕު ނެރެފައި ވަނީ 2019ވަނަ އަހަރުއެވެ. އެފަދަ ބައެއް ފޮތްތަކުގެ ދެވަނަ ޗާޕު ނެރުނީ މިއަހަރުއެވެ.
Ads by STO
