ޓީޗާރސް ރަޖިސްޓްރޭޝަން ބޯޑް އެކުލަވައިލައިފި
ޓީޗާރސް ރެޖިސްޓްރޭޝަން ބޯޑު އެކުލަވައިލައި އެ ބޯޑަށް މެމްބަރުން އައްޔަން ކޮށްފިއެވެ.
އަލަށް އެކުލަވާލި ތައުލީމީ ގާނޫނުގެ ދަށުން އުފައްދަން ޖެހޭ ޓީޗާރސް ރެޖިސްޓްރޭޝަން ބޯޑަށް ވަނީ 5 މެމްބަރުން އައްޔަން ކުރައްވައިފައެވެ.
މިބޯޑަށް އައްޔަނު ކުރައްވައިފައިވާ ފަސް މެމްބަރުންނަކީ ބޯޑުގެ ރެޖިސްޓްރާއެއްގެ ގޮތުގައި އައްޔަން ކޮށްފައިވާ އެޑިއުކޭޝަންގެ ސްޓޭޓް މިނިސްޓަރު އައިޝަތު އާތިޔާ ނަސީރެވެ. އެޑިޔުކޭޝަނަލް މެނޭޖްމަންޓް ދާއިރާ ނުވަތަ ތައުލީމީ ސިޔާސަތުގެ ދާއިރާއިން އެޑިޔުކޭޝަން އޮފިސަރު ނަހުޒާ ޝަރީފް އައްޔަންކޮށްފައިވާއިރު ކިޔަވައިދިނުމުގެ ދާއިރާއިން އައްޔަން ކުރެއްވީ އެޑިޔުކޭޝަން އޮފިސަރު ޔުސްރާ މުރާދެވެ.. އަދި ތަޢުލީމީ މަންހަޖު އެކުލަވައިލުމުގެ ދާއިރާއިން އެޑިޔުކޭޝަން ޑިވެލޮޕްމަންޓް އޮފިސަރު ކޯޑިނޭޓަރު އާމިނަތު މުހައްމަދާއި ޗައިލްޑް ސައިކޮލޮޖީ ނުވަތަ އެޑިޔުކޭޝަނަލް ސައިކޮލޮޖީގެ ދާއިރާއިން އެޑިޔުކޭޝަން އޮފިސަރު ފައުޒިއްޔާ އަލީ ވަނީ އައްޔަން ކޮށްފައެވެ.
މިދިޔަ އަހަރު ފާސްކުރި ތައުލީމުގެ ގާނޫނުގައިވާ ގޮތުން އެ ގާނޫނުނަށް އަމަލުކުރަން ފަށާތާ މަސް ދުވަހުގެ ތެރޭގައި ފަސް މެމްބަރުންގެ މައްޗަށް އެކުލެވޭ "ޓީޗާސް ރަޖިސްޓްރޭޝަން ބޯޑު" އެޑިޔުކޭޝަން މިނިސްޓްރީން އެކުލަވާލަން ޖެހެއެވެ. ރާއްޖޭގެ ޓީޗަރުން ރަޖިސްޓަރީކޮށް ޓީޗަރުންނަށް ލައިސަންސްދިނުމުގެ ގަވާއިދުތަކާއި އުސޫލުތައް އެކުލަވައިލާނީ އެ ބޯޑުންނެވެ.
އާ ގާނޫނާ އެކު ސްކޫލުތަކުގައި ކިޔަވައިދޭ ޓީޗަރުންނާއި އެ ނޫން ވެސް ތަނެއްގައި ކިޔަވައިދޭ ނަމަ އެ މީހެއްގެ އަތުގައި ކިޔަވައިދިނުމުގެ ލައިސަންސްއެއް އޮންނަން މަޖުބޫރެވެ. އައި މި ލައިސަންސް ދޫކުރާނީ މިބޯޑުންނެވެ.
ގާނޫނުގައި ބުނާ ގޮތުން، މި ބޯޑުގެ ރިޔާސަތު ބަލަހައްޓާނީ މިނިސްޓަރު އައްޔަން ކުރައްވާ ރަޖިސްޓްރާއެކެވެ. އެމީހަކީ އެޑިއުކޭޝަން މިނިސްޓްރީގައި މަސައްކަތް ކުރައްވާ، ޑެޕިއުޓީ މިނިސްޓަރު ނުވަތަ އެއަށް ވުރެ މަތީ މަގާމެއް އަދާކުރައްވާ ބޭފުޅަކަށް ވާންޖެހެއެވެ. ރަޖިސްޓްރާގެ އިތުރުން ބޯޑުގައި ތިބެން ޖެހޭނީ އެޑިއުކޭޝަނަލް މެނޭޖްމަންޓް ދާއިރާ ނުވަތަ ތައުލީމީ ސިޔާސަތުގެ ދާއިރާގެ ބޭފުޅަކާއި ކިޔަވައިދިނުމުގެ ދާއިރާގެ ފަރާތަކާއި ތައުލީމީ މަންހަޖު އެކުލަވަލައިލުމުގެ ދާއިރާގެ ފަރާތަކާއި ޗައިލްޑް ސައިކޮލޮޖީ ނުވަތަ އެޑިއުކޭޝަނަލް ސައިކޮލޮޖީގެ މީހެކެވެ.
Ads by STO
