އިސްލާމް،ދިވެހި ފޮތުން މައްސަލައެއް ފެނިއްޖެނަމަ މިނިސްޓްރީއަށް އެންގުމަށް އެދިއްޖެ
ސުކޫލުތަކުގައި ކިޔަވައި ދިނުމަށް ބޭނުން ކުރަން އެޑިޔުކޭޝަން މިނިސްޓްރީން ފޮނުވައިފައިވާ ފޮތްތަކުން އެއްވެސް ކުށެއް ފާހަގަކުރެވިއްޖެ ނަމަ، އެޑިއުކޭޝަން މިނިސްޓްރީއަށް އެންގެވުމަށް އެ މިނިސްޓްރީން އެދެފިއެވެ.
އެމިނިސްޓްރީން ވިދާޅުވީ ސްކޫލުތަކުގައި މިހާރު ބޭނުންކުރާ އިސްލާމާއި ގުރުއާން ފޮތްތައް އިސްލާހުކުރަމުން އަންނާތީ، އެ ފޮތްތަކުގައި ރަނގަޅުކުރަން ޖެހޭ އެއްވެސް ކުށެއް ފާހަގަކުރެވިފައިވާ ނަމަ، އެ ފޮތަކާއި ސޮފްހާ އެނގޭގޮތަށް [email protected] އަށް އީމެއިލެއްގެ ޒަރީއާއިން އެކަމެއް އަންގަވައި ދެއްވުމަށް އެދޭކަމަށެވެ.
ރާއްޖޭގެ ސްކޫލުތަކުގައި ކިޔަވައިދެމުން އަންނަ ޤުރުއާން އަދި އިސްލާމް ފޮތްތަކުގައި ޤުރުއާނުގެ ބައެއް އާޔަތްތައް ނުބައިކޮށް ލިޔެފައި ހުރިކަން ފުރަތަމަ ފާހަގަކޮށްފައި ވަނީ، ދީނީ އިލްމުވެރިޔާ، ރައީސް ޔާމީންގެ ވެރިކަމުގައި އިސްލާމިކް މިނިސްޓަރުކަން ކުރެއްވި ޑރ.މުޙައްމަދު ޝަހީމް އަލީ ސަޢީދެވެ.
މިކަމާ ބެހޭ ގޮތުން އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އަބްދުﷲ ރަޝީދު ވިދާޅުވީ، ދެ ފޮތެއްގައި ޤުރުއާންގެ އާޔަތްތަކުގައި މައްސަލަ ޖެހިފައި ވަނީ ޑރ.ޝަހީމް އިސްލާމިކް މިނިސްޓަރު ކަމަށް ހުންނެވިއިރު ނެރުނު ފޮތްތަކެއްގައި ކަމަށެވެ. އަދި އެ ކުށްތައް ނުފެނި މިއަދާ ހަމައަށް ވެސް ޕްރިންޓްވަމުން އަންނަ ކަމަށް އޭނާ ވިދާޅުވިއެވެ. ނަމަވެސް ކުށް ފާހަގަވެފައި ހުރި ބައެއް ފޮތްތަކުގެ ފުރަތަމަ ޗާޕު ނެރެފައި ވަނީ 2019 ވަނަ އަހަރުއެވެ. އަދި އޭގެ ދެވަނަ ޗާޕެއް މި އަހަރު ނެރެފައި ވެއެވެ.
Ads by STO
