މިމަހުގެ 6ވަނަ ދުވަހާ ހަމައަށް ފާހަގަ ކުރެވުނު ކުށްތައް އިސްލާހުކުރަން ފަށައިފިން: އެޑިއުކޭޝަން
ރާއްޖޭގެ ސުކޫލުތަކުގައި ކިޔަވައިދޭން އެޑިއުކޭޝަން މިނިސްޓްރީން ފޮނުވައިފައިވާ ފޮތްތަކުގައި ގުރުއާނުގެ ބައިގައި ބޮޑެތި މައްސަލަތަކެއް ހުރިކަން ފާހަގަވެ އެކަން މިނިސްޓްރީގެ ސަމާލުކަމަށް އައުމާ އެކު އެ މައްސަލަތައް އިސްލާހުކުރުމުގެ މަސައްކަތް ފަށައިފައިވާ ކަމަށާއި އެ ކުށްތައް އިސްލާހުކުރެވިފައިވާ ފޮތްތައް ދަރިވަރުންނާ ހަވާލު ކުރުމުގެ މަސައްކަތް މިހާރު ފަށައިފައިވާކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
"ދެން"އަށް މައުލޫމާތު ދެއްވަމުން އެޑިޔުކޭޝަން މިިނިސްޓްރީގެ ޑެޕިއުޓީ މިނިސްޓަރ ޝަރުމާ ނަސީރު ވިދާޅުވީ ފޮތްތަކުގައި މައްސަލަތައް ހުރިކަން އެޑިއުކޭޝަން މިނިސްޓްރީގެ ސަމާލުކަމަށް އައި ހިސާބުން ފެށިގެން އެ ފޮތްތަކުގައި ހުރި ކުށްތައް އިސްލާހު ކުރުމަށް ސުކޫލުތަކަށް އަންގާފައިވާއިރު މިހާރު ގިނަ ދަރިވަރުންނަށް އިސްލާހު ކުރެވިފައިވާ ފޮތްތައް ދީފައިވާ ކަމަށެވެ.
"މިމަހުގެ 6 ވަނަ ދުވަހާ ހަމައަށް މިނިސްޓްރީއަށް ފާހަގަކުރެވިފައި ހުރި ކުށްތައް އިސްލާހުކޮށްފައިވާ ފޮތްތައް މިހާރު ހަމަ އޯލްމޮސްޓް އޯލް ސުކޫލަށް މިވަނީ ދީފައި. އިތުރު ކުށްތައް ހުރިތޯ ބަލަން ކޮމިޓީ އުފައްދައިފައި އެކޮމިޓީގެ މަސައްކަތް ނިމުނީމަ ދެން ޗާޕް ކުރާ ބެޗްގައި ކުށްތައް ހުންނާނީ އިސްލާހުކުރެވިފައި" ޝަރްމާ ވިދާޅުވިއެވެ.
ދަރިވަރުންނަށް ކިޔަވައިދިނުމަށް ތައްޔާރުކޮށްފައިވާ ހުރިހާ ކީ ސްޓޭޖްތަކެއްގެ އިސްލާމް އަދި ޤުރްއާން ފޮތްތައް އަލުން ބަލައި ޕްރޫފްރީޑް ކުރުމުގެ މަސައްކަތް ކުރުމަށް މިނިވަން ކޮމެޓީއެއް އެކުލަވައިލައި، އެ ކޮމެޓީގެ މަސައްކަތް ފަށައިފައިވަނީ މިދިޔަ ހަފްތާތެރޭގައެވެ.
މި ކޮމެޓީ އެކުލަވައިލައިފައި ވަނީ ކޮންމެ ގްރޭޑަކަށް ތިން މެންބަރުންގެ މައްޗަށް އެކުލެވޭ ޓީމެއް ހިމެނޭ ގޮތަށް ކަމަށާއި މި ޓީމްތަކުގެ މަސައްކަތް އަންނަ ހަފްތާގެ ނިޔަލަށް ނިންމައި ކޮންމެ ޓީމަކުން ވެސް، ފޮތްތަކުގައި ހުރި ކުށްތައް ފާހަގަކޮށް ތަފްޞީލް ރިޕޯޓެއް އެކުލަވައިލާނެކަމަށް އެޑިޔުކޭޝަން މިނިސްޓްރީން ވިދާޅުވެއެވެ.
