ޚިޔާނާތުގެ ފައިސާއިން 35 މިލިޔަން ރުފިޔާ ކަޅު ދަބަހެއްގައި ރައީސް ޞާލިޙް ގެންދެވި: އަލީ ވަހީދު

ރާއްޖޭގައި މިހާތަނަށް ހިނގާދިޔަ އެންމެ ބޮޑު ޚިޔާނާތުގެ މައްސަލަ ކަމުގައިވާ އެމްއެންޕީއާރސީ ކޮރަޕްޝަންގެ ފައިސާގައި މިހާރު ވެރިކަމުގައި ހުންނެވި އިބްރާހީމް މުޙައްމަދު ޞާލިޙް ޖެހިވަޑައިިގެންފައިވާ ކަމަށް ކުރީގެ ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.

Ads by MWSC

ޖިންސީ ފުރައްސައިރައިގެ ތުހުމަތުތަކެއް ކުރެވުމުން ވަޒީރުކަމުން ވަކި ކުރައްވައިފައިވާ އަލީ ވަހީދު މިހެން ވިދާޅުވެފައި ވަނީ އޭނާގެ މައްޗަށް ކޮށްފައި ވަނީ ސިޔާސީ ދައުވާއެއް ކަމަށާއި ތުހުމަތުތަކަކީ މަޤާމުގެ ދަހިވެތި ކަމުގައި ހަދައިގެން ދައްކާ ވާހަކަތަކެއް ކަމަށް ވިދާޅުވެ އިނގިރޭސި ވިލާތުގައި ހުންނަވައިގެން ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުންނެވެ.

އަލީ ވަހީދު ވިދާޅުވީ އެމްއެންޕީއާރސީގެ ޚިޔާނާތުގެ ފައިސާ ނެގި މީހުންގެ ތެރޭގައި އެމްޑީޕީގެ އެންމެ އިސް ފަސް މީހުންގެ ތެރޭގައި އޭރު ހިމެނިވަޑައިގަންނަވާ ބޭފުޅެއް ހިމެނޭ ކަމަށެވެ. އަދި އޭނާގެ ނަން ހާމަ ކުރަން ބޭނުން ނުވާ ކަމަށް ވިދާޅުވިއެވެ. އަދި ވިދާޅުވީ އެ ބުނާ ބޭފުޅަކު ކަޅު ދަބަހެއްގައި 35 މިލިޔަނަށް ވުރެ ގިނަ ފައިސާ ގެންގޮސްފައިވާ ކަމަށެވެ. އެއީ ކާކުތޯ ނޫސްވެރިން ތަކުރާރުކޮށް ސުވާލު ކުރުމުން އަލީ ވަހީދު ވިދާޅުވީ އެމްއެންޕީއާރސީގެ ޚިޔާނާތުގެ މައްސަލައިގައި ރައީސް ޞާލިޙްގެ ނަންފުޅު ވެސް ފުރަތަމަ އޮތް ކަމަށެވެ. އަދި އޭނާގެ ރައީސް ޞާލިޙްގެ ނަން ލިސްޓުން އުނި ކުރެއްވީ، އެސިސްޓެންޓް ކޮމިޝަނަރ އޮފް ޕޮލިސް މުޙައްމަދު ރިޔާޒު ކަމަށް ވިދާޅުވިއެވެ.

"ކަޅު ދަބަސް އުފުލި ރައީސް ޞާލިޙު ވެސް. އެ ވީޑީއޯތައް ވެސް ހުންނާނެ. ތަޙްޤީޤީ ބަޔާނުގައި ވެސް އެ ވާހަކަތައް ހުންނާނެ. ޕޮލިސް ރިކޯޑިންގ އެ އެއްޗެހި ފޮހެލީ މުޙައްމަދު ރިޔާޒު." ޢަލީ ވަހީދު ވިދާޅުވިއެވެ.

އަލީ ވަހީދު އިތުރަށް ވިދާޅުވީ، އޭރުގެ ޓޫރިޒަމް މިނިސްޓަރުގެ އަޙްމަދު އަދީބް ދެއްވި ފައިސާ ނެންގުމަށް އޭރު އެމްޑީޕީގެ ޕާލިމެންޓްރީ ގްރޫޕްގެ ލީޑަރުކަން ކުރައްވަމުން ގެންދެވި ރައީސް ޞާލިޙް ވަޑައިގެންފައި ވަނީ ރެހެންދި ފްލެޓަށް ކަމަށާއި އެކަން ހިނގައިދިޔައިރުގެ ސީސީޓީވީ ފްޓޭޖްތައް ވެސް ހުންނާނެ ކަމަށެވެ.

އަލީގެ ވާހަކަފުޅުގައި ވިދާޅުވީ، އެމްޑީޕީގެ ތެރޭގައި ވެސް އެމްއެމްޕީއާރސީގެ ޚިޔާނާތުގެ ފައިސާގައި ޖެހިވަޑައިނުގަންނަވާ ބޭފުޅުން ތިއްބެވި ކަމަށެވެ. މިގޮތުން މާފަންނު އުތުރު ދާއިރާގެ މެންބަރު އިމްތިޔާޒު ފަހުމީގެ ނަން އޭނާ ވަނީ ވަކިން ފާހަގަ ކުރައްވައިފައެވެ.