ކޮވިޑް ބަލިމަޑުކަމުގެ ތެރޭގައި ބަނގްލަދޭޝް ސަރުކާރުން ފޯރުކޮށްދިން އެހީތެރިކަމަށް ރައީސުލްޖުމްހޫރިއްޔާ ޝުކުރު އަދާކުރައްވައިފި
ކޯވިޑް-19ގެ ބަލިމަޑުކަމުގެ ތެރޭގައި ބަނގްލަދޭޝް ސަރުކާރުން ރާއްޖެއަށް ފޯރުކޮށްދިން އެހީތެރިކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ޝުކުރު އަދާކުރައްވައިފިއެވެ.
ބަނގްލަދޭޝް ސަރުކާރުގެ އެހީތެރިކަމަށް ރައީސް ސާލިހު ޝުކުރު އަދާކުރެއްވީ އ.ދ. ގެ ޢާންމު މަޖިލީހުގެ 76 ވަނަ ބައްދަލުވުމުގެ ޙަވާސާގައި ބަނގްލަދޭޝްގެ ބޮޑުވަޒީރު ޝައިހް ހަސީނާއާ އެކު ބޭއްވި ބައްދަލުކުރެއްވުމުގައެވެ.
މި ބައްދަލުކުރެއްވުމުގައި ދެ ބޭފުޅުން ވަނީ، ދެ ޤައުމުން ގުޅިގެން މަސައްކަތްކުރަން އެއްބަސްވެފައިވާ ދާއިރާތަކާ ގުޅޭގޮތުން މަޝްވަރާ ކުރައްވައިފައެވެ. އޭގެ ތެރޭގައި ޞިއްޙީ ދާއިރާއާއި، ތަޢުލީމީ ދާއިރާ ހިމެނެއެވެ.
މި ބައްދަލުކުރެއްވުމުގައި ދެ ބޭފުޅުން ވަނީ ކޯވިޑް-19 ޕެންޑަމިކްގެ ތެރޭގައި ދެޤައުމަށް ކުރިމަތިވި ގޮންޖެހުންތަކާ ގުޅޭގޮތުން މަޝްވަރާ ކުރައްވައިފައެވެ. އަދި ރައީސުލްޖުމްހޫރިއްޔާ ވަނީ ކޯވިޑް-19 ކޮންޓްރޯލްކުރުމަށް ދިވެހި ސަރުކާރުން އަޅައިފައިވާ ފިޔަވަޅުތަކާ ގުޅޭގޮތުން ވާހަކަފުޅު ދައްކަވައިފައެވެ. އެގޮތުން، ކޯވިޑް-19 ޕެންޑަމިކްގެ ތެރޭގައި ސަރުކާރުން އެންމެ އިސްކަމެއް ދިނީ ރާއްޖޭގައި ދިރިއުޅޭ ބިދޭސީ މަސައްކަތްތެރިން ވެސް ހިމެނޭގޮތަށް، ރާއްޖޭގައި ދިރިއުޅޭ ހުރިހާ ފަރާތްތަކަށް އެކަށީގެންވާ ޞިއްޙީ ފަރުވާ ލިބޭނެ އިންތިޒާމުތައް ހަމަޖެއްސުމަށާއި، އެ ހުރިހާ ފަރާތްތަކަށް ވެކްސިން ދެވޭނެ އިންތިޒާމު ހަމަޖައްސައިދިނުމަށް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި، ކޯވިޑް-19ގެ ބަލިމަޑުކަމުގެ ތެރޭގައި ބަނގްލަދޭޝް ސަރުކާރުން ރާއްޖެއަށް ޞިއްޙީ މާހިރުންގެ ޓީމެއް ފޮނުވައިދެއްވައި، ކޮވިޑް-19ގެ ބަލިމަޑުކަމާ ދެކޮޅަށް ރާއްޖެއިން ކުރަމުންގެންދާ މަސައްކަތަށް އެއްބާރުލުންދީ އެހީތެރިކަން ފޯރުކޮށްދީފައިވާތީ އެކަން ރައީސުލްޖުމްހޫރިއްޔާ ޝުކުރުވެރިކަމާއެކު ފާހަގަކުރެއްވިއެވެ.
މި ބައްދަލުކުރެއްވުމުގައި ބޮޑުވަޒީރު ހަސީނާ ވަނީ އެ ޤައުމުގައި ކޯވިޑް-19ގެ ބަލިމަޑުކަމުގެ ޙާލަތު ކުރިއަށްވުރެ ރަނގަޅުވެ، މި ބަލީގައި މަރުވާ މީހުންގެ ޢަދަދު ބޮޑުތަނުން ދަށަށް ގޮސްފައިވާކަން ފާހަގަކުރައްވައިފައެވެ. މީގެ އިތުރުން ރާއްޖޭގައި ދިރިއުޅޭ ބަނގްލަދޭޝްގެ މަސައްކަތްތެރިންގެ ތެރެއިން ޤަވާޢިދާ ޚިލާފަށް ދިރިއުޅޭ ފަރާތްތައް ޤަވާޢިދުގެ ތެރެއަށް އަލުން ވެއްދުމަށް ކޯވިޑް ޕެންޑަމިކްގެ ތެރޭގައި ރާއްޖެއިން ކުރި މަސައްކަތްތަކަށް ޓަކައި ދިވެހި ސަރުކާރަށް އެކަމަނާ ޝުކުރު އަދާކުރެއްވިއެވެ.
މޫސުމަށް އަންނަ ބަދަލުތަކުގެ މައުޟޫޢަށް އަލިއަޅުވައިލައްވަމުން ރައީސުލްޖުމްހޫރިއްޔާ ވަނީ، ބަނގްލަދޭޝްއާއި ރާއްޖެއަކީ ކްލައިމެޓް އިމަރޖެންސީ އެންމެބޮޑަށް ތަޖުރިބާކުރެވޭ ނާޒުކު ޙާލަތެއްގައިވާ ދެ ޤައުމުކަން ފާހަގަކުރައްވައިފައެވެ. އަދި ކްލައިމެޓް ވަލްނަރަބަލް ފޯރަމުގެ މިހާރުގެ ޗެއާގެ ހައިސިއްޔަތުން ބަނގްލަދޭޝްއިން ކުރަމުންގެންދާ މަސައްކަތްތަކަށް ރައީސުލްޖުމްހޫރިއްޔާ ވަނީ ތަޢުރީފު ކުރައްވައިފައެވެ.
މީގެ އިތުރުން، މި އަހަރުގެ ނޮވެންބަރު މަހު ގްލަސްގޯގައި ބާއްވާ ކޮޕް-26 ސަމިޓުން އެދެވޭ ނަތީޖާތަކެއް ނެރުމަށް ބަނގްލަދޭޝްއާއި ރާއްޖެއާ ގުޅިގެން މަސައްކަތް ކުރުމަށް އުންމީދު ކުރައްވާކަމުގައި ދެބޭފުޅުން ވެސް ވިދާޅުވިއެވެ. އަދި ބޮޑުވަޒީރު ޝައިޚް ޙަސީނާ ވަނީ ކަނޑުގެ ލޮނުގަނޑު އުފުލުމުގެ މައްސަލައަކީ ބަނގްލަދޭޝްއާއި ރާއްޖެއަށް ވެސް ނުރައްކަލާ ކުރިމަތިކުރުވާނެ މައްސަލައެއްކަން ފާހަގަކުރައްވައި، އެހެންލީޑަރުންނާ އެކު ބާއްވަވާ ބައްދަލުކުރެއްވުންތަކުގައި ވެސް އެކަމާމެދު މަޝްވަރާކުރައްވާނެކަން ހާމަކުރައްވައިފައެވެ.
ރައީސުލްޖުމްހޫރިއްޔާ ވަނީ ރޮހިންޔާ މުސްލިމުންގެ ކަންކަމުގައި ރާއްޖެއިން ބަނގްލަދޭޝްއަށް ތާއީދުކުރާކަން ހާމަ ކުރައްވައި، އިންޓަރނޭޝަނަލް ކޯޓް އޮފް ޖަސްޓިސް މެދުވެރިކޮށް ރޮހިންޔާ މުސްލިމުންނަށް އިންސާފު ހޯދައިދިނުމަށް ބަންގްލަދޭޝް ސަރުކާރާއި އޮގަނައިޒޭޝަން އޮފް އިސްލާމިކް ކޯޕަރޭޝަންއާ ގުޅިގެން މަސައްކަތްކުރައްވާނެކަމުގައި ވިދާޅުވެފައެވެ.
މީގެ އިތުރުން ދެ ބޭފުޅުން ވަނީ އައު ދާއިރާތަކުން ދެ ޤައުމުގެ ގުޅުންތައް ބަދަހިކޮށް، ދެ ޤައުމުގެ ދެމެދުގައި އެއަރ ކާރގޯގެ ޚިދުމަތް ފެށުމަށް މަސައްކަތްކުރުމަށާއި ވިޔަފާރިއާ ކޮމަރސް އަދި އިކޮނޮމިކް ޑިޕްލޮމަސީ ދާއިރާއިން ގުޅުންބަދަހިކުރުމާ ގުޅޭގޮތުން ވާހަކަފުޅު ދައްކަވާފައެވެ.
މި ބައްދަލުކުރެއްވުން ނިންމަވާލައްވަމުން ދެ ބޭފުޅުން ވަނީ ދެ ޤައުމުން އިސްކަންދޭ ކަންކަމުގައި ގުޅިގެން މަސައްކަތް ކުރެއްވުމަށާއި، ސަރަހައްދީ އަދި ބައިނަލްއަޤްވާމީ ގުޅުންތައް ވަރުގަދަ ކުރެއްވުމަށް ވެސް ދެ ޤައުމުން ގުޅިގެން މަސައްކަތް ކުރައްވާނެކަމުގައި ވިދާޅުވެފައެވެ.
