އައިއޯސީސީގެ ރައީސަކަށް ޑރ. ޝަހީމް
އައިއޯސީސީގެ ރައީސްކަމަށް ކުރީގެ އިސްލާމިކް މިނިސްޓަރ، އަދި އިސްލާމިކް ޔުނިވަރސިޓީގެ ކުރީގެ ޗާންސެލަރ، އަދި އޮގަނައިޒޭޝަން އޮފް އިސްލާމިކް ކޯޕަރޭޝަން ( އޯއައިސީ) ސެކްރެޓަރީ ޖެނެރަލްގެ ކުރީގެ އެޑްވައިޒަރ ޑރ މުޙައްމަދު ޝަހީމް ޢަލީ ސަޢީދު އިންތިޚާބުވެވަޑައިގެންފިއެވެ.
ދީނީ ގިނަ ޢަދަދެއްގެ ޢިލްމުވެރިންނާއި ތަފާތު ދާއިރާތަކުގެ ޢިލްމީ ފުންނާބު އުސް ބޭފުޅުން ހިމެނޭހެން އިސްލާމިކް އޮގަނައިޒޭޝަން ފޯ ކަލްޗަރ އެންޑް ސިވިލައިޒޭޝަން( އައިއޯސީސީ) ހިންގާ ކޮމިޓީ އެކުލަވައިލައި، މިއަހަރު ޙާޞިލްކުރުމަށް އިސްކަންދޭނެ ޕްރޮގްރާމްތައް ރޭ ވަނީ ކަނޑައަޅައިފައެވެ.
ހިންގާ ކޮމިޓީ އެކުލަވާލުމަށް ޓަކައި ރޭ ބޭވި ބައްދަލުވުމުގައި، ހަތަރު ނާއިބު ރައީސުން ވެސް ވަނީ އިންތިޚާބު ކުރެވިފައެވެ. މިގޮތުން، ވައިސް ޕްރެޒިޑެންޓް ޖެންޑަރ އެންޑް ޝޯޝަލް އެފެއާޒްގެ މަޤާމަށް އިންތިޚާބުކުރެވުނީ މަޝްހޫރު އަންހެން ދީނީ ޢިލްމުވެރިޔާ ޑރ. އަނާރާ ނަޢީމެވެ. ވައިސް ޕްރެޒިޑެންޓް ކަލްޗަރ އެންޑް ސިވިލައިޒޭޝަންގެ މަޤާމަށް އިންތިޚާބު ކުރެވުނީ ޑރ. މޫސާ އަންވަރު ޙަސަނެވެ. ވައިސް ޕްރެޒިޑެންޓް ރިސާރޗް، ސައެންސް އެންޑް ޓެކްނޮލޮޖީގެ މަޤާމަށް އިންތިޚާބު ކުރެވުނީ ޑރ. އިސްމާޢީލް ޝަފީޢުއެވެ. އަދި ވައިސް ޕްރެޒިޑެންޓް އިންޓަރނޭޝަނަލް އެފެއާޒްގެ މަޤާމަށް އިންތިޚާބު ކުރެވުނީ އަލީ އަޙުސަނެވެ.
ރޭގެ ބައްދަލުވުމުގައި، ހިންގާ ކޮމިޓީގެ ހުރިހާ މަޤާމަކަށާއި، އިސްލާމިކް އެޑްވައިޒަރީ ކައުންސިލުގެ މަޤާމުތަކުގެ އިތުރުން އިންޓަރނޭޝަނަލް އެޑްވައިޒަރުންނާއި ޚާއްޞަ ދާއިތާތަކުގެ މުސްތަޝާރުންނާއި އެންވޯއީން ވެސް ވަނީ ކަނޑައަޅައިފައެވެ. ހިންގާ ކޮމިޓީ އިންތިޚާބު ކުރުމަށް ފަހު، އައިއޯސީސީގެ ފަރާތުން މިއަހަރު ކުރުމަށް އިސްކަންދޭނެ ކަންކަން ވެސް ވަނީ ކަނޑައަޅައިފައެވެ.
