ޔާޔާ ދޫކޮށްލިޔަސް ދެ މަސް ވަންދެން މީސް މީޑިއާގައި ޕޯސްޓެއް ނުކުރެވޭނެ!
ޓިކްޓޮކްގައި ބަރަހަނާ ވީޑިއޯ އާންމުކުރި މުޙައްމަދު ނަބީލު "ޔާޔާ" ބަންދުން ދޫކޮށްލިޔަސް، ދެ މަސް ދުވަސް ވަންދެން މީސް މީޑިއާ ޕޯސްޓެއް ނުކުރެވޭނެ ކަމަށް ކްރިމިނަލް ކޯޓުން ޝަރުތު ކޮށްފިއެވެ.
އަމިއްލަ ޖިންސީ ގުނަވަން މީސް މީޑިއާގައި ދެއްކި މައްސަލައިގައި ޔާޔާ ހައްޔަރު ކުރީ މިދިޔަ ސެޕްޓެމްބަރު މަހު ކުރީކޮޅުގައެވެ. ފުލުހުން އޭނާ ހައްޔަރު ކުރީ، ޓިކްޓޮކްގައި އޭނާ އާންމު ކުރި އެ ވީޑިއޯ ވަރަށް ބޮޑަށް އާންމުވުމަށް ފަހު، އޭނާ ހައްޔަރު ކުރުމަށް އެތައް ބަޔަކު ގޮވައިލަމުން ދަނިކޮށެވެ.
ހައްޔަރު ކުރުމަށް ފަހު، ބަންދުގެ މުއްދަތު ތިންވަނަ ފަހަރަށް ޖަހަން ކޯޓަށް ގެންދިޔުމުން ޔާޔާ ދޫކޮށްލައިފައި ވަނީ މިދިޔަ އަންގާރަ ދުވަހުއެވެ.
ޔާޔާ ދޫކޮށްލި ޝަރުތުތަކުގެ ތެރޭގައި ދެ މަސް ދުވަސް ވަންދެން މީސް މީޑިއާގައި އެއްވެސް ޕޯސްޓެއް ނުކުރުން ހިމެނޭއިރު އެކަމަށް އޭނާ ވަނީ އެއްބަސް ވެސް ވެފައެވެ.
