އެއަރޕޯޓް މައްސަލައިގައި ނަޝީދާއެކު އިދިކޮޅުން ބޮޑު ބަހުސަކަށް
ވެލާނާ އިންޓަރނޭޝަނަލް އެއަރޕޯޓް އިންޑިއާގެ ޖީއެމްއާރް ކުންފުންޏަށް ތަރައްޤީކުރަން ދިން މައްސަލައިގައި ކުރީގެ ރައީސް މުހައްމަދު ނަޝީދާއި އިދިކޮޅުގެ ބައެއް އިސްބޭފުޅުން ބޮޑު ބަހުސެއް ފައްޓަވައިފިއެވެ.
ނަޝީދުގެ ސަރުކާރުގައި އެއަރޕޯޓް ޖީއެމްއާރް ކުންފުންޏަށް ދިން މައްސަލައިގެ ބަހުސް އެންމެ ފުރަތަމަ ދެކެވެން ފެށީ ޖީއެމްއާރަށް މާލޭ ބައިނަލްއަޤްވާމީ ވައިގެ ބަނދަރު ދީފައި ވަނީ ރައީސް މުޙައްމަދު ނަޝީދު 78 މިލިއަން ރުފިޔާ ބޭނުންފުޅު ވުމުން ކަމަށް އެމަނިކުފާނުގެ ކެބިނެޓްގައި ހިމެނި ވަޑައިގެންނެވި ޓުއަރިޒަމް މިނިސްޓަރ ޑރ.މަރިޔަމް ޒުލްފާ ކްލަބް ހައުސްގެ ފޯރަމެއްގައި ވިދާޅުވުމުންނެވެ. އެއަށް ފަހު، ފިނޭންސް މިނިސްޓަރު އިބްރާހިމް އަމީރު ވަނީ ޖީއެމްއާރަށް އެއަރޕޯޓް ދިނުން ދިފާޢު ކުރައްވައިފައެވެ. އިއްޔެ އަމީރު ވަނީ އެއާޕޯޓު ޖީއެމްއާރު ކުންފުނިން އަތުނުލި ނަމަ ރާއްޖޭގެ އިޤްތިޞާދު މިހާރު އޮންނާނީ 10 ބިލިއަން ޑޮލަރަށްވުރެ ވެސް މަތީގައި ކަމަށެވެ. އަދި ޖީއެމްއާރުން އެއާޕޯޓު އަތުލުމަކީ މިހާތަނަށް ރާއްޖޭގެ އިޤްތިޞާދުގައި ހިންގި އެންމެ ބޮޑު ޖަރީމާކަމަށް ވެސް އަމީރު ވިދާޅުވިއެވެ.
މިކަމާ ގުޅިގެން މިއަދު ހެނދުނު ވެސް ރައީސް ނަޝީދު ވަނީ އެކަން ދިފާއު ކުރައްވައި ވާހަކަ ދައްކަވައިފައެވެ. އެގޮތުން ޖީއެމްއާރަށް އެއާޕޯޓު ދޭން ނިންމީ ރާއްޖޭގެ އިގްތިސޯދު ދެގުނައަށް ކުރިއަށް ޖެއްސުމުގެ ނިޔަތުގައިކަމަށް ނަޝީދު ވިދާޅުވިއެވެ. އޭގެ ފަހުން އެމަނިކުފާނާއި އަމީރުގެ ވާހަކަތަކަށް އިދިކޮޅަށް ނިސްބަތްވާ ބައެއް މެމްބަރުން ވަނީ ރައްދު ދެއްވައިފައެވެ.
އިދިކޮޅުގައި ތިއްބެވި މެމްބަރުން ވިދާޅުވަނީ އެއާޕޯޓަކީ ހަމައެކަނި އިގްތިސޯދާއި ގުޅިފައިވާ ތަނެއް ނޫން ކަމަށެވެ. އަދި އެއީ ދިވެހިރާއްޖޭގެ މިނިވަންކަމާ ވެސް ގުޅިފައިވާ ތަނެއްކަމަށް އިދިކޮޅުން ބުނެއެވެ. މީގެ އިތުރުން ކުރީގެ ރައީސް އަބްދުﷲ ޔާމީންގެ ވެރިކަމުގައި އެއާޕޯޓުގައި އަލަށް ތަރައްގީކުރި ތަންތަން އޮޕަރޭޝަނަށް ގެންނަން އިދިކޮޅުން ގޮވައިލެއްވިއެވެ.
އޭގެ ފަހުން އަނެއްކާ ވެސް ރައީސް ނަޝީދު ވަނީ އެއާޕޯޓާ ގުޅިގެން ވާހަކަ ދައްކަވައިފައެވެ. ވިދާޅުވީ ނެޓް ޕްރެޒެންޓް ވެލިއު ނުވަތަ އިގްތިސޯދު މިންކުރާ ހަމައިން ބަލާނަމަ އެންމެ ފައިދާ ބޮޑު ކަމުގައި ފާހަގަ ކުރެވުނީ ޖީއެމްއާރުން ހުށަހެޅި ހުށަހެޅުން ކަމަށެވެ.
"ކުރިއަށް އަދާކުރައްވާ ފީގެ ގޮތުގައި ޖީއެމްއާރުން އެއްފަހަރާ އަދާކުރެއްވި 78 މިލިއަން ޑޮލަރު އެއީ ބީލަން ހުށަހެޅުއްވި ހުރިހާ ފަރާތެއްގެ ތެރެއިން ހުށަހެޅުއްވި އެންމެ މަތީ އަދަދު" ރައީސް ނަޝީދު ވިދާޅުވިއެވެ.
ނަޝީދުގެ މިވާހަކަތަކަށް ފަހު އަނެއްކާ ވެސް އިދިކޮޅުން ވަނީ މިމައްސަލައިގައި ރައްދު ދީފައެވެ. އެގޮތުން މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ޖީއެމްއާރު ކުނި ވަޅުލިތަނުގައި ރައީސް ޔާމީން ބިނާކުރީ ދެވަނަ ރަންވޭއެއްކަމަށެވެ.
"ކޮވިޑްގެ ހާލަތު އައިއިރު އެއާޕޯޓު ދިވެހިންގެ އަތުގައި ނެތް ނަމަ ޑޮލަރުގެ އަގު އުޅޭނީ 40 ރުފިޔާއިން މަތީގައި. ނުބައި ހިސާބު ނުޖައްސަވާ. ދިވެހިންނަށް ހައްގު ވަނީ އަޅުވެތިކަމެއް ނޫން" ސައީދު ވިދާޅުވިއެވެ.
ސައީދުގެ އިތުރުން ނައިފަރު ދާއިރާގެ މެމްބަރު އަހުމަދު ޝިޔާމް ވެސް ވަނީ ބޭރުގެ ކުންފުންޏަކަށް ރާއްޖޭގެ މައި ވައިގެ ބަނދަރު ވިއްކައިލުން ކުށްވެރިކޮށް ވާހަކަ ދައްކަވައިފައެވެ. އެގޮތުން ރާއްޖޭގެ އިގްތިސޯދު ކުރިއެރުވޭނީ އަދި މިނިވަންކަން ދެމެހެއްޓޭނީ އެއާޕޯޓު ދިވެހިންގެ އަތުގައި އޮވެގެންކަމަށް ޝިޔާމް ވިދާޅުވިއެވެ.
