ތިމާވެއްޓަށް ގެއްލުންވާތީ ހުޅުމާލެ ނަރުދަމާގެ މައްސަލަ މަޖިލީހަށް!
ތިމާވެއްޓަށް ގެއްލުންވާނެ ކަމަށް ވިދާޅުވެ ހުޅުމާލޭގައި ގާއިމް ކުރުމަށް ހަމަޖެހިފައިވާ ސުވޭޖް ޓްރީޓްމަންޓް ޕްލާންޓްގެ މައްސަލައެއް ރައްޔިތުންގެ މަޖިލީހުގެ މައްޗަންގޮޅީ ދެކުނު ދާއިރާގެ މެމްބަރު އަހްމަދު ހައިތަމް މަޖިލީހަށް މައްސަލައެއް ހުށައަޅައިފިއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އެޑްރެސް ކުރައްވައި މެމްބަރު ހައިތަމް ފޮނުއްވި ސިޓީގައި ހުށައެޅުއްވި މިމައްސަލައިގައި ވިދާޅުވީ ހުޅުމާލޭގައި ސުވޭޖް ޓްރީޓްމަންޓް ޕްލާންޓް އެޅުމުގެ ޓެންޑަރ ފަރުމާކުރެވިފައި ވަނީ ޓްރީޓް ނުކުރާ ނަޖިސް ކަނޑަށް ދޫކޮށްލެވޭ ފަދަ ގޮތަކަށް ކަމަށެވެ. އަދި ޓްރީޓްކުރެވިފައިވާ ފެން، ފެން ފަށަލައިގެ ތެރެއަށް ދޫކޮށްލެވޭ ފަދަ ގޮތަކަށްކަމަށް ވެސް މެމްބަރު ހައިތަމްގެ މައްސަލައިގައި ވަނީ ފާހަގަކުރައްވައިފައެވެ.
"ޓްރީޓްކުރެވިފައިވާ ފެން، ފެން ފަށަލައިގެ ތެރެއަށް ދޫކޮށްލެވޭ ފަދަ ގޮތަކަށެވެ. ސުވޭޖަކީ އެކި ޒާތުގެ ވިހަ މާއްދާއާއި ފާމަސޫޓިކަލް ރެޒިޑިއު އަދި މައިކްރޯޕްލާސްޓިކް ހިމެނޭ އެއްޗެއް ކަމުގައި ވާ އިރު، ޓްރީޓް ނުކުރާ ފެން ދޫކުރުމަކީ ކަނޑު ތަޣައްޔަރުވެ ގުދުރަތީ ވެއްޓަށާއި ކަނޑުގެ ދިރުންތަކާއި އިންސާނުންނަށް ވެސް ނޭދެވޭ އަސަރު ކުރުވާ ކަމެކެވެ. ކަނޑުގައި ދިރިއުޅޭ މަސްމަހާމެހިން މައިކްރޯޕްލާސްޓިކާއި ކެމިކަލްގެ ބާވަތްތައް ފެންނަމުންދާކަން ދިރާސާތަކުން ވެސް މިހާރު ހާމަވަމުން ދާ އިރު، މިއީ ޙަޤީޤަތުގައި ވެސް ކަންބޮޑުވާން ޖެހޭ މައްސަލައެއް ކަމުގައި އަޅުގަނޑު ޤަބޫލުކުރަމެވެ." މެމްބަރު ހައިތަމް ހުށައެޅުއްވި މައްސަލައިގައި ވިދާޅުވިއެވެ.
ހައިތަމް ވިދާޅުވީ ޓެންޑާގައި ބުނެފައިވާ ފެންވަރުގެ ޓްރީޓްމަންޓް ޕްލާންޓެއް ޤާއިމުކޮށް ހިންގުމަށް ޓަކައި ދުވާލަކު 15 މެގަވޮޓުގެ ކަރަންޓު ބޭނުންވާނެ ކަމަށާއި މިއީ ރާއްޖޭގެ އެންމެ އާބާދީ ބޮޑު މާލެ ސިޓީއަށް ދުވާލަކު ބޭނުންވާ ކަރަންޓުގެ މިންވަރުގެ ތިންބައި ކުޅަ އެއްބައި މިންވަރު ކަމުގައި ވާ ހިނދު، މިއީ ކަރަންޓު އުފެއްދުމަށް ޓަކައި ގަންނަންޖެހޭ ތެލާއި، ޕްލާންޓު ހިންގުމަށާއި މެއިންޓެނަންސް ފަދަ ކަންކަމަށް ބަލާއިރު ވެސް ބޮޑު ޚަރަދެއް ދާނެ ކަމެއް ކަމުގައި ދެކޭ ކަމަށެވެ.
އެހެންކަމުން މިކަންކަމުގައި ޒިންމާވާ ފަރާތްތައް މަޖިލީހަށް ހާޒިރުރުކޮށް، މިމައްސަލަ ވީހާ ވެސް އަވަސް ފުރުސަތެއްގައި ބަލައިދިނުމަށް ހައިތަމްގެ ސިޓީގައި ވަނީ އެދިފައެވެ.
