މަކުނުދުއަށް މުޅިން އައު އެމްބިއުލާންސެއް ފޮނުވަން ވަނީ ހަމަޖެހިފައި: ރާއީ
މުޅިން އައު އެމްބިއުލާންސެއް މަކުނުދުއަށް ފޮނުވަން ހަމަޖެހިފައިވާކަމަށް ރައްޔިތުން މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.
ރާއީ މިފަދައިން ވިދާޅުވެފައި ވަނީ މަކުނުދޫގައި ބަލިމީހުން އުފުލާނެ އެމްބިއުލާންސެއް ނެތުމުން ބަލި މީހަކު ބަރޯގައި ސިއްހީ މަރުކަޒަށް ގެންދާ ފޮޓޯތަކެއް މީސް މީޑިޔާގައި ދައުރުވަމުންދާ ދަނޑިވަޅެއްގައެވެ.
ރާއީ ވިދާޅުވީ މިހާރު ރާއްޖެ ގެނެވިފައިވާ އެމްބިއުލެންސްތަކުގެ ތެރެއިން އެމްބިއުލެންސެއް މަކުނުދުއަށް ފޮނުވުމަށް ނިންމައިފައިވާކަން މަކުނުދޫގެ ހެލްތު ސެންޓަރާއި، އޭނާއަށް ވެސް ރައީސް ޞާލިޙް އަންގަވައިފައިވާ ކަމަށެވެ. އަދި މިއީ މުޅިން އައު އެމްބިއުލޭންސެއް މަކުނުދުއަށް ފޮނުވާ ފުރަތަމަ ފަހަރު ކަމަށް ރާއީ ވިދާޅުވިއެެވެ.
"ދެން"އަށް މައުލޫމާތު ދެއްވަމުން މަކުނުދޫ ކައުންސިލްގެ ރައީސް އައުޒަމް އާދަމް ވިދާޅުވީ އެ ރަށުގައި އޮންނަ އެމްބިއުލާންސަކީ ވަރަށް ގިނަ ދުވަސްވެފައިވާ އެމްބިއުލާންސެއް ކަމަށާއި އެ އެމްބިއުލެންސްގައި ވަރަށް ގިނައިން މައްސަލަ ޖެހޭކަމަށެވެ. އަދި ބަރޯގައި ސިއްހީ މަރުކަޒަށް މީހުން އުފުލުމަކީ އާއްމުކޮށް ވެސް އެ ރަށުގައި ހިނގާކަމެއް ކަމަށް އޭނާ ވިދާޅުވިއެވެ.
